И.Е. Винокуров аатынан Намнааҕы педагогическай колледжка ыччаты кэрэ эйгэҕэ уһуйар преподавателлэр, колледж бастыҥ выпускниктара, талааннаах маастардар, 30 сыл биир санаанан салайтарбыт эйэҕэс ыал Андрей уонна Елена Осиповтар үбүлүөйдээх бэлиэ саастарыгар уонна Россияҕа дьиэ кэргэн сылынан, айар үлэлэрин сырдатар «Ымыылах ыал ыллыктара» быыстабкаларын үөрүүлээх аһыллыыта буолла.
Намнааҕы педагогическай училищеҕа «Уруһуй, черчение уонна үлэ» идэтин иккиэн 1995, 1996 сыллардаахха утуу-субуу бүтэрэннэр, Саха государственнай педакадемияҕа «Уруһуй уонна черчение» учууталын идэтин баһылаабыттар.
Елена Дмитриевна Намнааҕы педколледжа 2001 сылтан студеннары декоративнай-прикладной искусство, ойуулуур-дьүьүннүүр искусство историятын дисциплиналарын үөрэтэн саҕалаабыт. Ону таһынан, колледж галереятын сэбиэдиссэйинэн 15 сыл үлэлээбит. Үлэлиир сылларыгар Саха өрөспүүбүлүкэтин худуоһунньуктарын, маастардарын үлэлэринэн элбэх ахсааннаах айымньылаах быыстапкалары тэрийбит. Студеннарга сүрүннээн туоһунан төрүт үгэһинэн оҥоруу, чочуйуу буолар. Бүгүн Елена Осипова туостан оҥоһуллубут «Хаар ачыкыларын-чарапчыларын» коллекциятын «Сардаана» мода театра мустубут дьоҥҥо-сэргэҕэ көрдөрдүлэр.
Андрей Алексеевич норуот уус-уран оҥоһуктарын маастара, «Саха сирин үөрэҕириитин туйгуна» бэлиэ хаһаайынынан буолар. 1999 сылтан Харбалаахтааҕы профессиональнай-техничэскэй училищеҕа маастарынан үлэлин саҕалаабыт. Намнааҕы педколледжа 2001 сылтан техническэй дисциплина преподавателынан үлэлиир. Дипломнай үлэлэри оҥотторорго Андрей Осипов студеннар сүрүн болҕомтолорун төрүт үгэс нөҥүө үөрэтиигэ уурар.
Бүгүн бэлиэ түгэҥҥэ биир идэлээхтэрэ, бииргэ үөрэммиттэрэ, доҕотторо, уһуйааччылара, улуус, нэһилиэк салалтатыттан кэлэн истиҥ-иһирэх эҕэрдэлэрин тириэртилэр. Өссө да уһун сылларга төрүт үгэспитин сөргүтэн, ыччакка иҥэрэн иһэллэригэр баҕа санааларын тириэртилэр. Өрөспүүбүлүкэҕэ, улууска үөрэх эйгэтигэр таһаарыылаах үлэлэрэ сыаналанан, уопсастыбаннай олоххо көхтөөхтөрүнэн түөскэ аньныллар бэлиэлэринэн, махтал, эҕэрдэ суруктарынан наҕараадаланнылар.
«Ымыылах ыал ыллыктара» быыстапка балаҕан ыйын 20 күнүттэн алтынньы 15-гэр диэри Намнааҕы педагогическай колледж Ефим Шапошников аатынан хартыына галереятыгар туруоҕа.
Семен АРГУНОВ