Спорт ветерана Иван Ядрихинскай үрүҥ хопто мээчиктэри, остуол устун көтүтэр остуол тенниһигэр күрэхтэһии тэрийдэ. Бүгүҥҥү күрэхтэһиигэ остуол тенниһин өрө тутааччылар эрэ буолбакка, Ньургун Тимофеев аатынан өрөспүүбүлүкэтээҕи олимпийскай эрэл спорт оскуолатын үлэһиттэрэ кыттыстылар.
“Култуура-спорт комплексыгар остуол тенниһигэр бэрт сэргэх дьарык буолла. Ол курдук, бүгүҥҥү дьарыкка Ядрихинскай Иван Гаврильевич бэйэтин көҕүлээһининэн бириис туруорда. Инньэ гынан, теннис остуолун дьарыгар интэриэс үөскэттэ, үтүө холобур көрдөрдө”, – диир Ньургун Тимофеев аатынан өрөспүүбүлүкэтээҕи олимпийскай эрэл спорт оскуолатын дириэктэрин солбуйааччы Раиса Негнюрова.
Иван Ядрихинскай көхтөөх, бэһиэлэй күрэхтэһии ыыппытыгар олимпийскай эрэл оскуолата махтанар. Бүгүн спорт ветерана күрэхтэһээччилэргэ айылҕаҕа сыһыанын, айылҕаны, булду, сир астыырын сөбүлүүрүн көрдөрбүт. Ону тэҥэ, бэйэтин илиитинэн астаан туруорбут бириистэрин туһунан киһи эрэ кэрэхсии истэр гына сиһилии кэпсээбитэ этиллэр.
Теннискэ дьахталларга Татьяна Чекурова кыайыылаах үрдүк аатын ылан күһүҥҥү бэлэм үргэммит көҕөнүнэн наҕараадаламмыт. Иккис миэстэлээх Любовь Бесчетноваҕа отон барыанньата уонна үһүс миэстэни ылбыт Диана Слепцоваҕа эт тушенката туттарыллыбыт.
Эр дьоҥҥо Иван Николаев бастыҥ теннисист аатын ылан эмиэ куһунан наҕараадаламмыт. Иккис ракетка Прокопий Петухов отон барыанньатын, үһүс Илларион Степанов Иван Ядрихинскай бэйэтэ астаабыт эт тушенкатын амсайар чиэскэ тиксибиттэр.
“Тэрээһин кыттыылаахтара күрэхтэһии хайдах ааспытын, бириистэр тустарынан санааларын үллэстэргэ эппитэ. Оччотугар, атыттар Иван Гаврильевич тэрийбит, көҕүлээбит күрэхтэһиититтэн куорсун анньынан маныаха сөптөөх тэрээһиннэри оҥоруохтара диэн сэмээр күүтүөхпүт.
Бэлиэтээн эттэххэ, Иван Ядрихинскай соторутааҕыта үбүлүөйдээх 65 сааһын туолбутунан теннис оонньооччулар сэмэй бэлэхтэрин туттардылар. Улуус, сэлиэнньэ ветераннарын сэбиэттэрин ааттарыттан махтанабыт”, – диир Раиса Дмитриевна.
Харысхан Попов