Отчуот: Хатырыктар улуус баһылыгар «Хатырык нэһилиэгин Ытык киһитэ» ааты иҥэрдилэр

Хатырык нэһилиэгэр отчуокка хаһан да буолбатах элбэх киһи кэлэн сырытта, 150 миэстэлээх саала туола сыыста.

Улахан экраҥҥа 40 мүнүүтэлээх
дьаһалта биир сыллаах үлэтэ илэ бааччы көстөн, дьон-сэргэ астынна. Улуус баһылыга Юрий Иннокентьевич отчуоттуон иннинэ «Хатырык нэһилиэгин Ытык киһитэ» ааты ылан махталын биллэрдэ.
Ааспыт саас өтөрүнэн буолбатах халаан уута кэлэн Хатырыктары соһуппута да, уолуппута да. Онуоха СӨ Ил Дарханыттан, Ил Түмэнтэн, улуус дьаһалтатыттан күүстээх көмө кэлэн нэһилиэк оһорунууга барда. Нэһилиэк дьоно-сэргэтэ ыарахан кэмҥэ сомоҕолоһон күүстээх үлэни ыыппыта. Онон сибээстээн Юрий Иннокентьевич үөрүүлээх быһыыга аналлаах бэлиэлэри, махтал суруктары Хатырык олохтоохторугар туттарда.
Саргы, Айсен Парникова, Анджела, Алексей Шадриннар, Надежда Жиркова, Денис Федоровтар Дьиэ кэргэн духуобунай уонна сиэр-майгы өттүнэн үгэстэрин харыстааһыҥҥа кылааттарын иһин Махтал суругунан бэлиэтэннилэр.
Ааспыт сайын ыарахаттары көрсүбүт Хатырык олохтоохторо, киһи сөҕүөх, бэйэлэрин тустарыгар биир да көрдөһүүнү киллэрбэтилэр. Ол оннугар нэһилиэктэрин кыһалҕатын туруорустулар. Сүрүн көрдөһүү терапевт уонна тиис бырааһын тула буолла. Дьиҥинэн, миэстэлэрэ баар эрээри, хас да ыйы быһа биллибэтилэр. Үгүс сылларга Лена Аммосова аатынан түөлбэ гаастааһынын туруорустулар да, киһи астынар эппиэтин ылбатылар. Быйылгы халаан уутун содулуттан 20 ыал көһөргө күһэлиннэ. Өскөтүн гаастаах уһаайбалар бааллара буоллар, элбэх киһи хаалыахтаах этэ.
Эмиэ халаан уутуттан улаханнык эмсэҕэлээбит дьиэлэри хаарбах дьиэттэн көһөрүү программатыгар киллэрэн, ууттан эмсэҕэлээбит нэһилиэк быһыытынан инники уочаракка киллэрэргэ көрдөстүлэр.
Үчүгэй да куһаҕаннаах диэбиккэ дылы асфальт суолбут бөһүөлэк хаарын уутун хаайан, саас аайы ыаллар ууга баралларынан уу ыытар хоруулары оҥорорго туруорустулар.
Чаҕылхай Максиммыт аатын сүгэр Судаарыстыбаннас түмэлэ үбэ-аһа тиийбэккэ дьонноро сокращениеҕа баран, үлэһиттэр бэйэлэрэ солбуһан харабыллыыллар эттилэр. Судаарыстыбаннас түмэлэ Ярославскай түмэлиттэн арахсан туспа барарыгар үлэ ыытарыгар көрдөстүлэр.
Түмүккэ, олохтоохтор сөптөөх эппиэттэри ылан, улуус дьаһалтатын үлэтин биһирииллэрин уонна махталларын ытыс тыаһынан биллэрдилэр.

Эрчим Баһыл, Россия суруналыыстарын сойууһун чилиэнэ

Читайте дальше