Партизан нэһилиэгэр Дьиэ кэргэн сыла биллэриллибитэ «Дьиэ кэргэн таптал уйата» диэн тэрээһининэн үөрүүлээхтик аһылынна.
Партизаҥҥа 50-тэн тахса сыл бииргэ олорбут дьиэ кэргэттэри чиэстээһин буолла. Ол курдук, Мария Василий Сыромятниковтарга, Варвара Егор Зыряновтарга, Парасковья Пётр Новгородовтарга, Люция Иван Ивановтарга, Маргарита Иван Гаврильевтарга, Ольга Пётр Кривошапкиннарга нэһилиэк Аҕа баһылыга Алексей Зырянов эҕэрдэ суруктары, сибэкки дьөрбөтүн туттарда. Бастыҥ ыалларга Нам улууһун дьиэ кэргэн уонна ыччат политикатын отделын салайааччыта Екатерина Евстафьева бочуотунай грамота уонна сэмэй бэлэхтэри туттарда. Екатерина Сергеевна тэрээһин кыттыылаахтарыгар дьиэ кэргэн отделын үлэтин сырдатта.
Бу күн дьиэ кэргэттэр ырыалара, үҥкүүлэрэ дьиэрэйдэ. Дьиэ кэргэн дьоро киэһэтин кэргэннии Саргылана Денис Федоровтар иилээн-саҕалаан ыыттылар. «Дьиэ кэргэн таптал уйата» тэрээһини Алексей Татьяна Зыряновтар ыллаан астылар.
Дьиэ кэргэн сылыгар барыгытын итиитик-истиҥник эҕэрдэлиибит! Бары дьиэ кэргэттэргэ өйөһүүнү, өйдөһүүнү, истиҥ сыһыаны, ыраас тапталы, байылыат олоҕу! Дьоллоох буолуҥ!
Полина Скрябина
Бэлиэтээн эттэххэ, Россияҕа Дьиэ кэргэн сылынан «Всей семьей» диэн бырайыак ыытыллар. Сиһилии всейсемьей.рф сайтка киирэн билсиҥ.