Нам улууһун Партизан нэһилиэгин орто оскуолатыгар 2023 сыл сэтинньититтэн төрүт ох саанан ытыыга дьарык саҕаламмыта. Нэдиэлэҕэ иккитэ — сэрэдэҕэ уонна бээтинсэҕэ баҕалаах оҕолор мустаннар өбүгэлэрбит төрүт охторунан ытыыга дьарыктаналлар. Оскуола спорт саалатыгар «Тир Бэргэн» диэн тэрийэн, бэйэтэ ох саанан ытыынан дьарыктанар Катерина Колесова оҕолору бэргэн ытыыга уһуйар.
«Тир Бэргэн» кыраҕы харахтаахтара бастыкытын улуус оскуолаларын икки ардыларыгар күрэхтэһиигэ кыттаннар III миэстэни ылары ситистилэр. Оскуолаларын чиэһин Алёша Михайлов, Дамир Тарабукин, Стас Михайлов көмүскээтилэр.
Дамир Тарабукин олус бэркэ ытан, 55 очкуону ылан, кыайыы өрөгөйүн биллэ. Охчут оҕолорбутугар биир дойдулаахпыт, урбаанньыт Петр Протопопов Саҥа дьыллааҕы бэлэх туттартаан үөртэ.
Охчуттарбытыгар дьаныардаах дьарыгы, инникитин өссө да ситиһиилэри дабайан иһэллэригэр баҕарабыт.
Полина Скрябина