Партизан нэһилиэгэр “Нам улууһа” МТ дьаһалтатын 2024 сыллааҕы отчуотун Нам улууһун баһылыгын тыа хаһаайыстыбатыгар солбуйааччы Филипп Николаев салайааччылаах 3-с бөлөх 17:00 чаастан саҕалаата.
Отчуот РФ Дьиэ кэргэн сылыгар холобур буолар көхтөөх дьиэ кэргэттэргэ бочуоттаах грамоталары туттарыыттан, наҕараадалааһынтан саҕаланна. Ону тэҥэ, быйыл халаан уутугар кэмигэр көмө оҥорбут дьоҥҥо махтал суруктары туттардылар.
Отчуокка уопсайа 28 туруорсуу уонна боппуруос киирдэ. Сана 2025 сылга күүстээх туруорсуу, нэһилиэккэ бары ирдэбилгэ эппиэттиир саҥа уһуйаан тутуута. Мыымах кварталга быйыл газ ситимэ киириэн наада. Бүгүҥҥү күҥҥэ 11 дьиэ тутуллан киирэргэ бэлэм олорор. Петр Баишев агрокластердарга хайаан да социальной газификациянан газ киирэригэр эрэллээҕин биллэрэр. Петр Новгородов Партизаҥҥа сир ылан аныгы ирдэбилгэ эппиэттиир күрүөлээх-хаһаалаах сарай оҥостубут баазатыгар оҕолору биэ ыан кымыс оҥорорго үөрэтиэ этибит диэн баҕа санаалааҕын эттэ. Партизан ууга барар нэһилиэктэргэ киирэринэн, сыл аайы олохтоохтор бэйэлэрин күүстэринэн оҥорон кэлбит сүөһүнү тутар дал күрүөтүн маһа өрөмүөннэнэригэр үп-харчы көрүллэрэ буоллар диэн Юлия Федорова этэр. Школьная, Ветераны ВОВ уулуссаларга уот кыамтата олус мөлтөҕүн ааһан, сотору-сотору уот барбатыгар сөптөөх миэрэ ылыллыан наадатын Розалия Колесова ыйда. Инникитин оскуолаҕа, балыыһаҕа капитальнай өрөмүөн ыытылларыгар субсидия көмө харчыта үрдүө дуо диэн дьону долгутар ыйытыылар туруоруллаллар. Эдэр специалистарга уопсай дьиэ боппуруоһа көтөҕүллэр. Ууга эмсэҕэлээбиттэр дьиэлэригэр капитальнай өрөмүөн хаһан ыытыллыай. Ыччат политикатын специалиһыгар хамнас көрүллүөн наадатын этинэллэр. Хаарбах туруктаах спортзал саҥа ирдэбилгэ эппиэттээбэтин, Якутск-Намцы сүрүн суолга бэлиэлэргэ, тохтобулларга болҕомто ууралларыгар уонна да атын боппуруостары биэрдилэр. Олохтоохтор газ уонна уот үлэһиттэрэ суоҕа, ахсааннааҕа хомоторун аһаҕастык эттилэр.
Нэһилиэкпит дьоно олус көхтөөхтүк кытыннылар. Бары биир хамаанда буолан күргүөмнээх үлэ барарын бэлиэтээтилэр уонна улуус олохтоох дьаһалтатын үлэтин 100% биһирииллэрин биллэрдилэр.
Полина Скрябина