“Рокада” хамаанда хапытаана – биир дойдулаахпыт Александра Лобашева

Мини-футболга Россия Кубогар биир дойдулаахпыт Александра Лобашева хапытааннаах “Рокада” хамаанда 3-с миэстэ буолбута.

Россия Кубогар 11 хамаанда көрсүбүтүттэн Волгоградтан “Рокада” хамаанда кыайыы иһин бэрт долгутуулаах, тыҥааһыннаах оонньуулары ааспытын Намтан төрүттээх Александра Лобашева этэр.

Александра футболга хайдах тиийбитий? Кини футболу өссө 12 сааһыттан сэргээн саҕалаабыт. Ол курдук, 2014 сыллаахха футболга аан дойду чемпионатыгар Бразилия Германияҕа хотторбутун өйдүүр. Ити курдук, Александра футболу интэриэһэргээбитэ барыта 8 саастаах быраатыттан Никустан саҕаламмыт. Быраата Никус футболга эмиэ кэккэ ситиһиилэрдээх эбит.

“Россия Кубогар 3-с миэстэҕэ тахсан турбуппутун тус бэйэм сыралаах үлэттэн кэллэ диэн сыаналыыбын. Ол курдук, хотторуу да баара, кыайыы да баара. Олох тиһэххэ диэри оонньооммут ылыахтаахпытын ылбыппытыттан үөрэбин. Мээчиги баһылыырбар тренербытыгар Максимова Елизавета Александровнаҕа махтанабын.

Бочуоттаах 3-с миэстэҕэ тахсар иһин оонньууга Москва “Экспресс” хамаандатын кытта көрсүһүү эрийсиилээхтик ааспыта. Холобура, 1:1 тэҥнэһэн иһэммит төбөбүнэн киллэрэн счету 2:1 оҥорбутум. Бүтэһик сөкүүндэлэргэ гол киллэттэрэн кэбиһэммит пенальтилыыр буолбуппут. Көрөөччүлэргэ, ыалдьааччыларга хаһан да буолбатах түгэни бэлэхтээбиппит – 6:5 ахсаанынан кыайбыппыт.

5х5 оонньооччулаах мини-футбол 11х11 оонньооччулаах улахан футболлааҕар быдан сылаалаах дии саныыбын. Биллэн турар, мини-футболу ордоробун.

Биир дойдулаахтарбар барыларыгар эҕэрдэбин тиэрдэбин. Үөрүүбүн тэҥҥэ үллэстэллэригэр махтанабын. Инникитин, дойдубар футбол (кэрэ аҥардар уонна эр дьон футбола) оонньуутун таһыма тахсарыгар, үрдүүрүгэр үлэлээн бэйэм кылааппын киллэрэр баҕа санаалаахпын»,  – диэн санаатын үллэстэр биир дойдулаахпыт Александра.

Харысхан Попов

Читайте дальше