Ытыктабыллаах Саха сирин олохтоохторо!
Саха Өрөспүүбүлүкэтин салалтатын аатыттан уонна тус бэйэм барыгытын Арассыыйа күнүнэн ис сүрэхпиттэн эҕэрдэлиибин!
Отут ордугуна түөрт сыллааҕыта, 1990 сыл бэс ыйын 12 күнүгэр, Арассыыйа Федерациятын судаарыстыбаннай суверенитетын туһунан Декларация ылыллыбыта. Дьылҕаны быһаарбыт ол күнтэн билиҥҥи Арассыыйаны түстээбит конституционнай реформа саҕаламмыта.
Бүгүн биһиги улуу дойдубут элбэх омуктаах норуотун сыралаах үлэтинэн-хамнаһынан күнтэн күн тэтимнээхтик сайдар, кыаҕырар, аан дойду биир модун судаарыстыбатын быһыытынан бөҕөргүүр. Биһиги экэниэмикэбит – планетаҕа биир бөдөҥнөрө. Хайдахтаах да моһоллору – тастан атааннааһыны, ахсаана суох элбэх санкциялары, Украинаҕа олохсуйбут режими арҕааҥыбэлиитиктэр харса
суох өйүүллэрин аахсыбакка, Бэрэсидьиэммит Владимир Владимирович Путин салалтатынан биһиги дойдубут эрэллээхтик иннин диэки хардыылыыр.
Бара турар анал байыаннай дьайыыга Саха сирин уолаттара саа-саадах тутан инники кирбиигэ Кыайыыны уһансаллар. Аҕа дойдуну көмүскүүр, эйэни, кырдьыгы туруулаһар туһугар үгүстэрэ баҕа өттүнэн Арассыыйа Сэбилэниилээх Күүстэрин кэккэтигэр киирэллэр. Кыргыһыы хонуутугар хорсун быһыыны көрдөрбүт хоһуун Геройдарбыт Александр Колесов, Филипп Евсеев, Алексей Неустроев, Дмитрий Егоров, Игорь Юргин, Николай Соболев, Николай Евдокимов албан ааттара дойду үрдүнэн дуораһыйда. Саха сирэ бэйэтин геройдарынан, хас биирдии буойунунан, биһиги уолаттарбытыгар көмөнү оҥорор хас биирдии киһинэн киэн туттар.
Саха сирэ – улуу дойду экэниэмикэтин Уһук Илиҥҥи бөҕө тирэҕэ, Арассыыйа Федерациятын тэтимнээхтик сайдар эрэгийиэннэриттэн биирдэстэрэ. Өрөспүүбүлүкэ олохтоохторо күүрээннээх үлэлэринэн дойду экэниэмикэтин модун кыаҕар сүҥкэн кылааттарын киллэрэллэр. Уһук Илиҥҥи федеральнай
уокурукка оҥоһуллан тахсар холбоһуктаах эрэгийиэннээҕи баалабай бородуукта чиэппэрин кэриэтэ, 23%, биһиги өрөспүүбүлүкэбитигэр тиксэр. Бу уустук кэмнэргэ сылтан сыл биһиги муҥутуур көрдөрүүлэри ситиһэбит – ньиэби, гааһы хостооһуҥҥа көрдөрүүлэрбитин саҥардан биэрэбит, алмааһы, чоҕу, көмүһү хостооһуҥҥа ылбыт кирбиилэрбитин ыһыктыбаппыт, саҥа индустрияны сайыннарабыт.
Ааспыт сылга дойду Бэрэсидьиэнэ Владимир Владимирович Путин Саха
сиригэр креативнай эйгэҕэ бастыҥ үлэ-хамнас ыытылларын бэлиэтээн үрдүк
сыанабылы биэрбитэ. Дойду баһылыга биһиги уопуппут киэҥник тарҕатыллан,
айар индустриялары сайыннарыы эрэгийиэннээҕи стандартын бэлэмнээһиҥҥэ
тирэх буолуохтааҕын ыйбыта.
Бэрт сотору Сахабыт сиригэр “Азия оҕолоро” VIII спортивнай оонньуулар ыытыллыахтара.
Арассыыйаҕа успуорт эйгэтигэр бу 2024 сылга норуоттар икки ардыларынааҕы
бөдөҥ тэрээһин. Манна 25 дойдуттан 2,8 тыһыынчаттан тахса эдэр спортсмен
кэлиэҕэ. Успуорт уонна доҕордоһуу киэҥ далааһыннаах, чаҕылхай
бырааһынньыга өргө диэри умнуллуо суоҕа диэн эрэнэбин. Элбэх омуктаах Саха сирэ үйэлэргэ Арассыыйа Федерациятын бигэ тирэҕинэн буолуоҕа.
Күндү доҕоттор! Арассыыйа күнүнэн өссө төгүл эҕэрдэлиибин!
Барыгытыгар дьолу-соргуну, эйэни уонна уйгулаах олоҕу баҕарабын! Дойдубут
туһугар бары саҕалааһыннаргыт ситиһиилээх буоллуннар!
Айсен Николаев, Саха Өрөспүүбүлүкэтин Ил Дархана