Саха-француз лицей Кыайыы сылыгар ананар тэрээһин ыытта

В.П. Артамонов аатынан саха-француз лицей Аҕа дойдуну Көмүскээччи, нэһилиэккэ Патриотизм сылын аһар тэрээһини ыытта.

Оскуола бүттүүн «Сахам сирэ» хору толорон, учууталлар «Кыайыы вальсын» үҥкүүлээн, баһылык солбуйааччыта Владилен Москвитин, лицей дириэктэрэ Юрчана Парникова, ветеран учуутал Николай Захаров эҕэрдэлээн бэлиэ сылы арыйдылар.

Үөрэнээччилэр кылаастарынан байыаннай тиэмэҕэ ырыалары толордулар. 9 кылаастан «Журавли», 11 «а»-лар «Мин мантан сэриигэ барбытым» уостан түспэт ырыалары бэлэмнээбиттэрэ кэрэхсэннэ. Маны сэргэ, уус-уран айымньылартан быһа тардан көрдөрдүлэр.

Ол курдук, В. Ушницкай-Сэки «Кыайыы буолуон иннинэ» (10 а), И.М. Павлов «Дьылҕаҕыттан туораабаккын» (9кыл.), Тимофей Сметанин «Кырдьык иһин кыргыһыы» (11 б) инсценировкалары туруордулар. Оҕолор таҥас-сап, араас атрибут булан кыһаммыттар.

Никольскайдааҕы И. Шарапов аатынан сири туһаныы музей дириэктэрэ, төрөппүт Парасковья Протопопова сэрии толоонуттан булуллубут сэдэх экспонаттары аҕалан билиһиннэрдэ.

Тэрээһиҥҥэ оҕо барыта кыттан, сэрии алдьархайын санаан, Кыайыы өрөгөйүн өйдөөн, сыаналаан ааһалларыгар тоҕоостоох буолла.

Мария Винокурова

Читайте дальше