Аҕа дойду Улуу сэриитин кыттыылааҕа Роман Заровняев бирииһигэр буулдьанан ытыыга Нам улууһугар күрэхтэһии буолан ааста. Хамаанданан уонна тус бэйэ бастыыр иһин күрэхтэһии үрдүк таһымҥа ыытыллыбыта бэлиэтэннэ.
“Биир дойдулаахпыт Роман Заровняев аатынан ыытыллыбыт күрэхтэһии, буулдьанан ытыыга улууспутугар бастакытын күүстээх тэрээһиннээхтик буолла диэн ааттыыбыт”, – диир күрэхтэһиини иилээн-саҕалаан ыыппыт Владимир Эверстов.
Роман Заровняев бирииһигэр буулдьанан ытыыга күрэхтэһии баар буоллун диэбит дьонтон биирдэстэрэ — МВД ветерана Валерий Шелковников. Валерий Михайлович күрэхтэһии төрүттэнэригэр сылы сыллаан үлэлэспитэ.
Хатырык, Бөтүҥ, Таастаах, Искра, Хатыҥ Арыы уонна Ленскэй нэһилиэктэртэн барыта 40-тан тахса ыттааччы бэйэтин күүһүн холонно. Күрэхтэһии национальнай көрүҥнэр программатынан барбытын быһыытынан, бары биир тэҥ саанан ыппыттар.
Олимпийскай программанан ыытыллар күрэхтэһиилэр ирдэбиллэрэ элбэҕэ бэрт эбит. Ол курдук, ытааччы таҥаһа-саба, саата бүтүннүү профессиональнай буолуохтаах. Ис иһигэр киирдэххэ, бэл диэтэр, буулдьа хаачыстыбата хайдаҕыттан ытара тутулуктанар эбит.
Ааттаах-суоллаах күрэхтэһиилэргэ Нам улууһун чиэһин көмүскүүр Күннэй, Владимир Эверстовтар дьиэ кэргэн куруук кыттар ытааччылары хамаандаҕа сүүмэрдиир, коллективтар икки ардыларыгар ыытыллар күрэхтэһиилэргэ көрөр эбит буоллахтарына, бу сырыыга, кыттааччылартан аҥаара саҥа дьон буолалларын этэллэр. Бэргэн ытааччы дьиэ кэргэн бигэргэтэринэн, күрэхтэһии хас сыл аайы күүс ылан ыыттыллан истэҕин ахсын кыттааччы элбиэҕэ. Оччотугар улуус хамаандатыгар кыраҕы харахтаах бэргэн ытааччылар бу күрэхтэһииттэн сүүмэрдэниэхтэрин сөп.
Саҥаттан-саҥа киһи көстөн сүүмэрдээһини ааһар, ытар хаачыстыбата тупсар. Маныаха сөптөөх күрэхтэһиилэри, Владимир Семенович билэринэн, Уус Алдан, Мэҥэ Хаҥалас, Горнай, Сунтаар, Чурапчы, Хаҥалас улуустара оҥороллор эбит. Кинилэр күрэхтэһиилэрэ, номнуо, өрөспүүбүлүкэ таһымыгар тахсыбыттар. Ити курдук, дьоҥҥор-сэргэҕэр ханнык баҕарар көрүҥҥэ төһөнөн элбэх күрэхтэһии тэрийэҕин да, оччонон ол көрүҥүн түргэнник сайдыыны ылара тэтимирэр.
“Өрөспүүбүлүкэ буулдьанан ытааччыларыгар, холобура, аатырбыт снайпер Иван Кульбертинов аатынан улахан күрэхтэһии буолар. Бу күрэхтэһиин эмиэ аан маҥнай бэйэтин улууһуттан саҕаламмыта. Онтон кэҥээн бүтүн Арассыыйатааҕы таһымҥа тахса үүннэ! Билигин үрдүк категориялаахтар бүтүн Арассыыйаттан кэлэн судьуйалыыллар.
Холобура, биһиэхэ хас да сыллаах кэтээн көрүү кэпсииринэн, комплекснай спартакиада тутула арыый да ураты буолан, куруук ытар киһиҥ хаачыстыбата муҥутуурдуу сайдан барбыта диэн ааттыыртан туттунабын. Маны этэн туран, буулдьанан ытааччылар күн аҥаарыгар диэри аҕыйах 10, 20 ытыылааҕы түмүктээн кэбиһэбит диэн туруорсаллара. Сыл ахсын хамсааһыннар, уларыйыылар буолаллара да…
“Манчаары оонньууларыгар” курдук комплекснай упражнениелаах толору ытыылаах күрэхтэһии дьэ, бүгүн буолла! Боростуойдук толкуйдаатахха, киһи дьарыктанан, үлэлээн, туруорсан тиийиэхтээх сиригэр ситиһэн тиийэр.
Буулдьанан ытыыга дьоҕус нэһилиэктэр бастакы боруобаланыылара буоллаҕа. Чуолаан, маннык күрэхтэһиилэртэн көстөн, тахсан кэлээччилэр үчүгэйдэр. Кинилэргэ мантан ыла интэриэстэрэ үрдээн иһэригэр баҕарабын. Бу манан этиэм этэ, буулдьанан эрэ ытыыга буолбакка, улууспут спорда тахсыылаах буоларыгар, баар көрүҥнэртэн бэйэҕит сөбүлээбиккитин талан саҕалыыргытыгар баҕа санаабын этэбин. Баар мэһэйи алдьатыҥ, истиэнэни үүттээҥ! Туох барыта кэлин үтүө, үчүгэй өттүнэн төннөрүн (отдача) умнумуохха наада!
Улуустааҕы спорт управлениета, МВД ветераннарын Сэбиэтэ күүстээхтик өйөөннөр, тэрийээһиҥҥэ улахан көмөнү оҥордулар. Кыайыылаахтарбыт Заровняевтар аймах сыаналаах бириистэринэн наҕараадаланан үөрүүлэрэ үксээтэ, санаалара бөҕөргөөтө. Ону тэҥэ, урукку сыллартан Нам улууһун буулдьанан ытааччылара сөптөөхтүк судьуйалаан күрэхтэһиибит, тэрээһиммит барыта санаа хоту буолан ааста”, – диэн сиһилии кэпсиир Владимир Эверстов.
Күрэхтэһии хас сыл ахсын баар буоллун диэн уопсай биир сүбэ ылыллыбыт. Эйэлээх олоххо участковайынан үлэлээбит Роман Заровняев чугас дьонноро, аймахтара, доҕотторо, биир идэлээхтэрэ олус үчүгэй сыаналаах бириистэри туруорбуттарын чорботобут, хайгыыбыт.
Инникитин улууска буулдьанан ытыы көрүҥүн өрө тутааччылар, туруорсааччылар күрэхтэһии өрөспүүбүлүкэ таһымыгар ыытылларыгар үлэлэһиэхтэрэ. Кэлэр сылга, намнар Роман Заровняев бирииһигэр буулдьанан ытыыны аһаҕас улуустааҕы күрэхтэһиини оҥорор былааннаахтар.
Харысхан Попов
Валерий Шелковников санаатын суруйар:
Турнирга 8 хамаанда кыттыыны ылла. Турнир олох үрдүк таһымҥа барбытын уопсай түмүк да көрдөрдө. Ол курдук, үс бастакы миэстэни ылбыт хамаандалар бары 9 очконы ыллылар. Манна кыайыылаах хамаанда коэффициент түмүгүнэн быһаарылынна.
Бастатан туран, Роман Семенович Заровняев мин аҕа кынным Алексей Семенович бииргэ төрөөбүт убайа буолар. Мин 1985 сыллаахха Хатырыкка күтүөт буолан кэлбитим. Роман Семенович туһунан кэргэним аҕатын уонна нэһилиэк дьонун кэпсээннэриттэн истэрим.
Бэйэм 1992 сыл сааһыттан 2018 сыл күһүнүгэр диэри Хатырыкка, Маймаҕаҕа, Түбэҕэ Нам ИДьУО (ол иһигэр 24 сылын участковай уполномоченнайынан) үлэлээн кэлбитим. Ити курдук, 2018 сыллаахха сынньалаҥҥа баран бараммын Р.С. Заровняев аатын үйэтитиэхпин баҕарбытым. Кини олоҕун, үлэтин туһунан өссө дириҥник МВД архивыттан билбитим. Ыспыраапкаҕа сурулларынан, Роман Заровняев Саха АССР Ис Дьыалатыгар 1936-1964 сс. үлэлээбитин чуолкайдаабытым.
МВД бэйэтин иһинэн буулдьанан ытыыга олус элбэх күрэхтэри үрдүк таһымҥа ыытар. Манан сиэттэрэн, былырыыҥҥыттан олохтоохтук саҕалаан биир идэлээхтэрбэр социальнай ситиминэн Р.С. Заровняев диэн милиция ветерана, снайпер баар, кини аатынан турнирда тэрийиэххэ диэн тыл көтөхпүтүм.
Туһааннаах дьоҥҥо сөп буола-буола санатан, наадалаах докумуоннар ирдэммиттэрэ. Онтон мин туруорсуубунан, 2023 сыл сааһыгар СӨ МВД ветераннарын Сэбиэтин бастакы солбуйааччыта Геннадий Алексеев, Нам ИДьУО начальнига Иван Емельянов, Нам улууһун ИДьУО ветераннарын Сэбиэтин председателэ Петр Собакин кыттыылаах бастакы мунньах буолбута. Сүбэлэһии түмүгүнэн, турниры тэрийэр наадалааҕынан ааҕан, улууска аан маҥнайгытын буулдьанан ытыыга Роман Заровняев бирииһигэр күрэхтэһии этэҥҥэ ааста. Хайаан барыта санаабытын курдук сатанан иһиэй. Өйүүр, өйөөбөт, билэр, билбэт киһи диэн баар буолар.
Быйыл Арассыыйаҕа участковай уполномоченнай сулууспа тэриллибитэ 100 сыла. Биһиги убайбыт, 38 сыл участковайынан үлэлээбит биир идэлээх аҕа табаарыспыт Роман Заровняев аатынан ыытыллыбыт турнир онно ананар!
Уопсай түмүккэ хамаанданан бириистээх миэстэлэри ыллылар:
1 миэстэ — Ленскэй нэһилиэк 1 хамаандата;
2 миэстэ — Ленскэй нэһилиэк 2 хамаандата;
3 миэстэ — Хатыҥ Арыы хамаандата.
Уолаттарга/кыргыттарга тииҥи ытааһыҥҥа хамаанданан:
1 миэстэ — Винокурова Милена (Хатыҥ Арыы);
2 миэстэ — Миронов Алексей (Ленскэй нэһилиэк);
3 миэстэ — Сивцев Ярослав (Таастаах).
Эр дьоҥҥо/дьахталларга тииҥи ытааһыҥҥа хамаанданан:
1 миэстэ — Петр Собакин (Ленскэй нэһилиэк);
2 миэстэ — Айсен Назаров (Хатыҥ Арыы);
3 миэстэ — Владислав Бандеров (Бөтүҥ).
Ветеран эр дьоҥҥо/дьахталларга тииҥи ытааһыҥҥа хамаанданан:
1 миэстэ — Семен Эверстов (Ленскэй нэһилиэк);
2 миэстэ — Валентина Сокольникова (Ленскэй нэһилиэк);
3 миэстэ — Евдокия Корчанова (Хатыҥ Арыы).
Хамаанданан хабдьыны сүүрэн кэлэн ытааһын:
1 миэстэ — 128,89 көрдөрүү бириэмэлээх Ленскэй нэһилиэк 1 хамаандата (Дьячковскай Эрнест, Петр Собакин, Валентина Сокольникова);
2 миэстэ — 129,03 бириэмэлээх Ленскэй нэһилиэк 2 хамаандата (Миронов Алексей, Андрей Осипов, Михаил Борисов);
3 миэстэ — 134,45 бириэмэлээх Хатыҥ Арыы хамаандата (Новгородова Алеся, Милена Ильина, Евдокия Корчанова).
Уолаттарга/кыргыттарга тус бэйэ бастааһыҥҥа тииҥи ытааһын:
1 миэстэ — Попова Екатерина (Ленскэй нэһилиэк);
2 миэстэ — Брызгалов Арсен (Ленскэй нэһилиэк);
3 миэстэ — Винокурова Милена (Хатыҥ Арыы).
Эр дьоҥҥо/дьахталларга тус бэйэ бастааһыҥҥа тииҥи ытааһын:
1 миэстэ — Петр Собакин (Ленскэй нэһилиэк);
2 миэстэ — Айсен Назаров (Хатыҥ Арыы);
3 миэстэ — Владислав Бандеров (Бөтүҥ).
Ветеран эр дьоҥҥо/дьахталларга тус бэйэ бастааһыҥҥа тииҥи ытааһын:
1 миэстэ — Семен Эверстов (Ленскэй нэһилиэк);
2 миэстэ — Евдокия Корчанова (Хатыҥ Арыы);
3 миэстэ — Егор Ефимов (Ленскэй нэһилиэк).
Аҕам саастаах ветеран эр дьоҥҥо/дьахталларга тус бэйэ бастааһыҥҥа тииҥи ытааһын:
1 миэстэ — Валентина Сокольникова (Ленскэй нэһилиэк);
2 миэстэ — Михаил Борисов (Ленскэй нэһилиэк);
3 миэстэ — Василий Захаров (Хатырык).
Уолаттарга/кыргыттарга тус бэйэ бастааһыҥҥа сүүрэн кэлэн хабдьыны ытааһын:
1 миэстэ — 94,07 бириэмэ көрдөрүүлээх Дьячковскай Эрнест (Ленскэй нэһилиэк);
2 миэстэ — Киприянова Айыллаана — 129,14 (Ленскэй нэһилиэк);
3 миэстэ — Миронов Алексей — 147,62 (Ленскэй нэһилиэк).
Эр дьоҥҥо/дьахталларга тус бэйэ бастааһыҥҥа сүүрэн кэлэн хабдьыны ытааһын:
1 миэстэ — 114,36 бириэмэ көрдөрүүлээх Айсен Назаров (Хатыҥ Арыы);
2 миэстэ — Милена Ильина — 118,40 (Хатыҥ Арыы);
3 миэстэ — Петр Собакин — 141,06 (Ленскэй нэһилиэк).
Ветеран эр дьоҥҥо/дьахталларга тус бэйэ бастааһыҥҥа сүүрэн кэлэн хабдьыны ытааһын:
1 миэстэ — 115,27 бириэмэ көрдөрүүлээх Евдокия Корчанова (Хатыҥ Арыы);
2 миэстэ — Егор Ефимов — 171,82 (Ленскэй нэһилиэк)
3 миэстэ — Владимир Николаев — 195,58 (Хатырык).
Аҕам саастаах ветеран эр дьоҥҥо/дьахталларга тус бэйэ бастааһыҥҥа сүүрэн кэлэн хабдьыны ытааһын:
1 миэстэ — 161,04 бириэмэ көрдөрүүлээх Михаил Борисов (Ленскэй нэһилиэк)
2 миэстэ — Валентина Сокольникова — 230,22 (Ленскэй нэһилиэк);
3 миэстэ — Раиса Негнюрова — 290,80 (Ленскэй нэһилиэк).
Анал бириистэр:
1. Саамай эдэр спортсмен — Хатыҥ Арыы оҕото Ильин Андрей (2012 с.т.). Андрей Намнааҕы МВД ветераннарын Сэбиэтин туруорбут 5000 солк. наҕараадаланна;
2. «Тииҥ» упражнениеҕа бастыҥ көрдөрүү — Петр Собакин. Петр Ивановичка Роман Заровняев төрөппүт кыыһа Раиса Бандерова дьиэ кэргэниттэн 10 000 солк.;
3. Инникилээх спортсмен. Уолаттарга уонна кыргыттарга «Тииҥ» упражнениеҕа бастыҥ көрдөрүү — Попова Екатерина. СВ уонна ВВ МВД палатка;
4. Саамай аҕа саастаах кыттааччы — Михаил Борисов. Михаил Петровичка Хатырык депутаттарын Сэбиэтэ туруорбут күлүүс набора;
5. Василий Захаровка Нам улууһун МВД үлэһиттэриттэн «Лабыҥкыр» маҕаһыыҥҥа 7000 солк. сертификат;
6. Хатырык хамаандатыгар Роман Заровняев аймахтарыттан 7000 солк.;
7. Егор Ефимовка Алексей Пинигин-Лоҥхоттан саха быһаҕа.
