Нам улууһун оҕолоро Саха сирин үөрэнээччилэрин “Спортивные Якутяне” спартакиада көрүҥнэригэр кыттан саҕалаатылар. Ол курдук, доруобуйаларынан хааччахтаах оҕолор чэпчэки атлетикаҕа Дьокуускайга көрүстүлэр.
“Спартакиада 29 спорт көрүҥүттэн бастакыта тохсунньу 15-17 күннэригэр “Триумф” спорт киинигэр буолла. Күрэхтэһиигэ барыта 11 улуустан 172 спортсмен кыттыыны ылбытыттан Нам улууһа 6 мэтээл ылан 3 бочуоттаах миэстэҕэ тахсан турда”, – диир Намнааҕы Оҕо спордун киинин дириэктэрэ Юрий Балаганскай.
Доруобуйаларынан хааччахтаах оҕолорго чэпчэки атлетикаҕа Нам улууһун Намнааҕы 1-кы нүөмэрдээх, Намнааҕы 2-с нүөмэрдээх уонна Хамаҕатта орто оскуолаларыттан 15 үөрэнээччи дьоһуннаахтык көмүскээн бириистээх миэстэҕэ тахсары ситистэ.
Хамаҕатта орто оскуолатын үөрэнээччитэ Игнатьев Ярослав икки үрүҥ көмүс мэтээллэри ылбыт. Хамаандаҕа Намнааҕы 2-с нүөмэрдээх оскуолаттан Матаннанов Артем уонна Намнааҕы 1-кы нүөмэрдээх оскуолаттан Собакин Святослав иккилии боруонса мэтээллэри аҕалбыттар. Биллэн турар, кыайыыга сирдииргэ бу алта мэтээл улахан оруоллаахтар.
15 үөрэнээччи өрөспүүбүлүкэҕэ үчүгэй көрдөрүүлээхтик күрэхтэһэригэр күүстэрин уурбут физкултуура учууталларыгар Колосова Сардана Петровнаҕа (НСОШ-2) уонна Исакова Татьяна Григорьевнаҕа (НСОШ-1) улуус дьоно-сэргэтэ махтаныах тустаахтар. Ситиһии салайааччы хайдах быһыылаах кэпсэтии ыытарыттан саҕалаан, тренер, уһуйааччы дьаныардаах үлэтиттэн кэлэр.
Харысхан Попов