Арбыҥҥа урут-уруккуттан волейболга сирдьит сулус оҥостор, тумус туттар дьонноох буоланнар, бу кыра бөһүөлэккэ маассабай спорт көрүҥэ умнуллан хаалбакка салҕанар. Өтөрдөөҕүтэ, өссө спорт саалата суох кэмнэригэр, кулуупка волейболлууллар эбит. Кэлин күрэхтэһиилэрин кэҥэтэн улуус таһымыгар ыыппыттар. Ол күүрээннээх сылларга талааннаах, кыахтаах оонньооччулар тахсыбыттар. Оннооҕор «СахаВА»-лар биһиэхэ оонньооҥ диэн ыҥыра сылдьыбыттаахтар эбит.
Оччотооҕу оонньооччулары, билигин 40-рын ааспыт дьону, Арбын оскуолата түмэ тардан, «Хотугу сулус-2023» диэн күрэхтэһии тэрийбит. Оонньуу тэрээһинин барытын оскуола бэйэтигэр ылынан, оҕолор хамаандаларын туруоран, нэһилиэк дьахталлара уонна эр дьоно тус-туспа хамаанда тэринэн тыҥааһыннаах, интэриэһинэй оонньууну көрдөрбүттэр.
Түмүгэр бастакы миэстэни оскуола оҕолоро, иккис миэстэни эр дьон, үсүһү дьахталлар хамаандалара ылбыттар.
Бу курдук, хотугу сулус хоһуун куттаах, чаҕылхай уота сырдыкка туһаайар, ыраас санааҕа салайар күүһэ уостубатын, уҕараабытын.
