2 Хомустаахха ахсынньы 31 күнүгэр Саҥа дьыллааҕы бастыҥнары чиэстиир дьоро киэһэ буолан ааста. Саҥа дьылга оҕо, дьон үөрүүтэ үксүүр, туох эрэ кэрэни, дьиктини кэтиир, күүтэр. Нэһилиэкпит аҕа баһылыга Лев Николаевич Новгородов эҕэрдэ тылынан дьоро киэһэбит саҕаланна. Кини 2023 сыл бастыҥнарын чиэстээн, махтал суруктары, сэмэй бэлэхтэри, наҕараадалары туттартаата, ылбаҕай эҕэрдэ ырыалар дьиэрэйдилэр.
Сыл түмүгүнэн түөлбэлэр күрэхтэрин түмүгэ үөрүүлээхтик биллэрилиннэ: бастаабыт «Сайдам» түөлбэ 100 тыһ. солк. харчынан, 2 м. – 70 тыһ. солк., 3 м. – 50 тыһ. солк., 4 м. — 30 тыһ. солк. наҕараадаланнылар.
Түөлбэлэр бу харчыларын олорор уулуссаларын тупсарыыга туттуохтара. Маны таһынан, үгэс буолбут сыл ахсын ыытыллар тиэргэн киэргэтиитин күрэҕэр көхтөөхтүк кытыннылар.
***
Тохсунньу 1 күнүгэр «Сэргэлээх» култуура киинин үлэһиттэрэ «Саҥа дьыллааҕы сүпсүлгэн» көрдөөх туруорууну көрдөрдүлэр. Бу кэннэ Саҥа дьыллааҕы сүүйүүлээх лоторея оонньонно. Лотерея сүрүн бирииһин – таҥас сууйар автомат массыынаны нэһилиэкпит ытыктабыллаах кырдьаҕаһа Мария Семеновна Яковлева сүүйэн үөрдэ-көттө.
***
Тохсунньу 3 күнүгэр «Сэргэлээх» култуура киинин үлэһиттэрэ оҕолорго анаан «Таал-Таал эмээхсин» остуоруйаны оонньоон көрдөрдүлэр. Моруос оҕонньор, Хаарчаана уонна сыл бэлиэтэ — Күөх Дракон буолан, оҕолорго Саҥа дьыллааҕы бэлэхтэри туттардылар. Оҕолор үөрүүлэрэ үгүс.
***
Тохсунньу 6 күнүгэр Хомустаах 2-с нэһилиэгэр «Ороһооспо күөх уота» буолла. Бу тэрээһини киинэ артыыһа, ырыаһыт, иллюзионист, тамада, үөрүү тренерэ Клавдий Афанасьев иилээн-саҕалаан ыытта. Дьон-сэргэ астына-дуоһуйа сынньанна.
2 Хомустаах «Сэргэлээх» этнокултуура киинэ