Нам сэлиэнньэтигэр сайыҥҥы кэмҥэ 2014 сыллаахтан Ленскэй нэһилиэк олохтоох дьаһалтата “eCOnam” (экологический сервисный отряд) диэн сервиснэй этэрээт үлэлэтэр. Кэлиҥҥи икки бүтэһик сылларга үс ый 100 оҕону хабан хамнастыыр.
“Сайын аайы Намҥа ыалдьыттааччылар сэлиэнньэ ырааһы тутарын хайҕыыллар. Бу барыта, оҕолорбут төрөөбүт түөлбэлэрин ыраастык туталларыгар, хомуйалларыгар олоҕурар.
Үөрэнээччилэр сайын устата үлэлээн харчыланаллар, сынньалаҥнарын туһалаах дьарыкка аныыллар. Этэргэ дылы, дьиэ кэргэн экономикатыгар бэйэлэрин кылааттарын киллэрэллэр”, – диир олохтоох дьаһалта үлэһитэ Анна Слепцова.
Оскуола үөрэнээччилэрэ төрөөбүт нэһилиэктэрэ ыраас турарыгар күүстэрин ууралларын, нэһилиэнньэ өттүттэн киртитии тахсыбатын туһугар кыһаллалларын Анна Слепцова этэр. Үөрэнээччилэр үлэнэн эрэ муҥурдаммакка, “Нам ыччата” диэн араас хайысхалаах бырайыагынан тэрээһиннэр ыытыллаллар. Холобура, оҕолор Өлүөнэ өрүс бэлиэ күнүгэр бэйэлэрин көрүүлэринэн өрүһү кэпсиир ойуулары уруһуйдаабыттар. Оттон от ыйын 8 күнүгэр Россияҕа Дьиэ кэргэн күнэ бэлиэтэнэригэр библиотека, олохтоох дьаһалта уонна ыччат специалиһа тэрээһин бэлэмнии сылдьаллара биллэр. Ити курдук үлэ сезонун устата оҕолору араас хайысхалаах тэрээһиннэр, акциялар, викториналар күүтэллэр.
Сервиснэй этэрээт көннөрү үлэнэн, ыраастааһынынан эрэ муҥурдаммата манна көстөр. Этэрээт оҕолорун “Түөлбэ” оҕо киинэ араас хайысхалаах бырайыактарга кытыннарар. Холобура, үөрэнээччилэр “Ресторанное дело” ас астыырга, дьиэ кыылын, көтөрдөрүн, оҕуруот астарын хайдах көрөргө-истэргэ үөрэнэллэр. “Түөлбэ” киин улахан көмөнү оҥорорун Анна Слепцова бигэргэтэр.
Бу ыйга сервиснай этэрээт 2-с сезонугар 30 оҕо сылдьар. Оттон атырдьах ыйыгар 20 оҕо үлэлиэхтээҕэ чопчуланар.
Сүрэхтээх, үлэни таптыы улаатар оҕолору Ленскэй нэһилиэк олохтоох дьаһалтата хамнастыаҕа уонна саастарын ситэ илик оҕо дьарыктаах буолуутун программатынан дьарыктаах буолуу киин харчы көрүөҕэ.
Харысхан Попов