Нам улууһугар «Блиндажная свеча» диэн окуопа чүмэчитин оҥорууга акция биллэриллибитэ. Салбаҥ нэһилиэгин дьаһалтата уонна дьахталларын түмсүүтэ нэһилиэк тэрилтэлэригэр, түөлбэлэригэр, хас биирдии дьонугар «акцияҕа кыттыаҕыҥ» диэн ыҥырыы таһаарбыта. Акция дойдубутун кѳмүскүү сылдьар дьоммут тоҥор-хатар кэмнэригэр иттэн, чэй, аһылык сылыттан ылалларыгар күүс-кѳмѳ, өйөбүл буолар сыаллаах ыытыллар.
Салбаҥ далбар хотуттара чүмэчи атыылаһыннаран, балаҕаҥҥа түмсэ түһэн, ким тугу гыныахтааҕын үллэстэн, ким хордуоҥкаттан тэҥ гына кырыйан, ким бааҥка иһин сууйан, ким кылдьыытын көннөрөн, ким чүмэчини кыра гына быһан, ким ону уулларан кутан, ким туора барбыт хордуоҥканы көннөрөн тустаах үлэлэрин сүр эппиэтинэстээхтик толордулар, 49 чүмэчини оҥорон бэлэмнээтилэр.
Татьяна Касьянова