Бу күннэргэ улууспутугар биир улахан үөрүүлээх түгэн буолаары турар. Ол курдук, Модут нэһилиэгин олохтоохторо, оҕолоро, учууталлара өртөн кэтэспит кэтэһиилэрэ, таас оскуолалара, үлэҕэ киириэхтээх.
Нам улууһун үөрэҕин управлениета үөрэх тэрилтэлэрин субуотунньукка графигынан сааһылаан туруорбутунан, оскуолалар, уһуйааннар тустаах күннэригэр тиийэн сууйан-сотон, иһирдьэ-таһырдьа үлэлээн көмөлөһөллөр. Оскуола бэйэтин үлэһиттэрин этэ да барбаккын, сотору кэминэн үлэҕэ киириэхтээх оскуолаларын үөрүүнэн сууйаллар, ис истэриттэн түбүгүрэллэр. Олохтоохтор онтон туора турбаттар, туох үлэ баарынан үлэлииллэр. Бэтэрээн учууталлар, уу тэстибэт доҕордуулар Николай Николаевич Кутуков, Михаил Дмитриевич Дьяконов күн аайы кэлэн мебель таҥаллар.
Оскуолаҕа киирдэххинэ — үлэ бырааһынньыгар кэлбит курдуккун, уһанар, тугу эрэ тоҥсуйар тыас-уус, ким эрэ кырааскалыыр, ким эрэ сууйар, эдэр биригээдэ уот тардар, директор Иван Павлович бэрт холкутук дьаһайар, ким эрэ субуотунньук дьонугар ас буһарар, иллэҥ киһи букатын суох, бары үлэлииллэр. Бэрт сотору үлэлээбиттэрин туоһута — уһун көрүдүөрдэр, сырдык ыраас кабинеттар, аныгылыы тупсаҕай аактабай саала, киэҥ-куоҥ спортивнай саала оҕолору кэрэҕэ, сырдыкка угуйуохтара турдаҕа.
Татьяна Касьянова