СӨ ситэриилээх былааһын ааспыт 2023 сыллааҕы үлэтин Ким Борисов салайааччылаах бастакы бөлөх бэҕэһээ Салбаҥҥа отчуоттаата. Ааспыт отчуот боротуокулугар уопсайа 8 туруорсуу киирбит. Онтон 1 туолбут, 1 туолар түһүмэххэ сылдьар, онтон атына болҕомтоҕо баар.
Оскуола-сад тутуутун, суол оҥоһуутун сиһилии быһааран биэрдилэр. Тустаах министерство улуус дьаһалтатын кытары ыкса үлэлэһэ сылдьалларын иһитиннэрдилэр. Уһук Илиҥҥи гектар программа төһө көдьүүһү көрдөрбүтүн, төһө туһалаабытын ыйыттылар (Нам улууһугар 200-тэн тахса киһи сир ылбыт). Кооперация сайдыытыгар хотон туттан баран механизированнай оҥорорго (уу ыытар турба, ноһуом таһаарыытыгар о.д.а.), нэһилиэккэ племенной оҕус ылыыга туох көмө баалларын ыйыттылар, сылгыны хааччахха иитии сокуона, тыа сиригэр эдэр дьону олохсутууга дьиэ туттууга көмө бырыһыана кыччаабытын сөбө суоҕун, суотабай сибээс быстар мөлтөҕүн эттилэр.
Улуус ыраах нэһилиэктэригэр убаҕас тобоҕу оботторор улахан кыһалҕа буоларын, итиэннэ туттар уонна иһэр уу кыһалҕатын болҕомтоҕо туруохтааҕын, агро-оскуолалары техниканан, уматыгынан хааччыйары туруорустулар.
СӨ ситэриилээх былааһын ааспыт 2023 сыллааҕы үлэ отчуотун 30 олохтоох иһиттэ.
Таастаах
СӨ Правительствотын 2023 сыллааҕы үлэтин Ким Борисов салайааччылаах бастакы бөлөх Таастаах олохтоохторугар отчуоттаата.
Улуустааҕы, өрөспүүбүлүкэтээҕи күрэхтэһиилэргэ, тэрээһиннэргэ кытта баралларыгар транспорынан уонна уматыгынан хааччынарга үп тиийбэтин эттилэр, итиниэхэ Таастаахха эрэ баар кыһалҕа буолбатах диэн туран баһаарынай резервуары ирдиир тустаах тэрилтэ монтажтыырга, сылытар матырыйаалы ыларга көмө буолалларыгар көрдөстүлэр.
Тыа сиригэр культура уонна доруобуйа харыстабылын салаатыгар эбии үлэ миэстэтин көрөллөрүгэр туруорустулар. Библиотека дьиэтин тутууга туох программа баарын токкоолостулар. Оскуола-сад тутуутун бырайыага бүтэн экспертизата оҥоһуллара хаалбыт. Ол эрэн, «НКТЭ» АО хочуолунай тутарыгар гаас давлениета тиийбэтинэн күчүмэҕэйдэри көрсөн эрэллэрин эттилэр. Тыа да хаһаайыстыбатыгар сыһыаннаах үгүс ыйытыыны биэрэн толору хоруйу иһиттилэр.
Олохтоохтор СӨ Правительствотын ааспыт 2023 сыллааҕы үлэтин биһирээтилэр.
