Ааспыт 2023 сыл балаҕан ыйын 6 күнүгэр СӨ Ил Дархана Айсен Николаев Нам улууһун киин балыыһатын саҥа эмтэнэр корпуһун бастакы сыбаайатын түһэриигэ кыттыбыта. Ол кэмтэн ыла тутуу үлэтин Игорь Борисов салайар “А-Капитал” ХЭТ ыытар.
-Билигин эмтэнэр корпус көҥдөйүн таһаара сылдьабыт, монолит кутабыт уонна тута кладкалаан иһэбит. Манна үс биригээдэ үлэлиир. 15 монолитчик баар, 6 каменщик уонна үс сыбааркаһыт инженернэй коммуникацияҕа үлэлииллэр. Бу сыллааҕы графикпытынан коробын таһааран бүтэриэхтээхпит, ол кэнниттэн барытын сабан, сылаас бүрүөһүнүн ууран, итиитин ыытан баран иһирдьэ өттүгэр отделочнай үлэни ыытыахпыт. Графикпытын тутуһабыт,— диир учаастак начальнига Андрей Михайлов.
Тутуу матырыйаалынан хааччыллыылара үчүгэй, былаанынан эрдэттэн атыылаһаллар, булуналлар, барытын тиэйэн таһаараллар. Тутуу тохтоло суох ыытыллар, эмтэнэр корпус дьэндэйэр. Инженернэй коммуникация үлэһиттэрэ септиги сыбааркалаан бүтэрбиттэр, кыраанынан көтөхтөрөн хаһыллыбыт сиригэр түһэрбиттэр, көмө сылдьаллар. Үлэһиттэр эбийиэк аттыгар вагоннарга олороллор. Тутууга 2 улахан уйуктаах кырааннаах массыына, 1 погрузчик, 1 таһаҕас таһар массыына үлэлиир.
Тутулла турар 50 миэстэлээх эмтэнэр корпус «Доруобуйа харыстабыла» национальнай бырайыак чэрчитинэн, «2021-2025 сс. доруобуйа харыстабылын алын сүһүөх звенотун сайыннарыы» региональнай программа иһинэн ыытыллар. Эбийиэк силигэ ситтэҕинэ акушерскай-гинекологическай, терапия уонна икки аныгы тэриллэринэн таҥыллыбыт эппэрээссийэлиир саалалардаах уопсай хирургия отделениелардаах, диагностика оҥорор сулууспалаах (рентген-кабинет, УЗИ, эндоскопическай чинчийии), приемнай покой, ону сэргэ суһал көмө сулууспата баар буолуо. Эмтэнэр корпус аныгы медицинскэй техниканан, тэриллэринэн хааччыллыаҕа. Ол барыта диагностирование уонна эмтээһин саҥа ньымаларын киллэрэргэ көмөлөһүөҕэ. Медицинскэй персонал үлэлииригэр усулуобуйата лаппа тупсарын, доруобуйаларын көрдөрөөччүлэр үрдүттэн олорон балыыһа иһигэр сырыылара табыгастаах буоларын, үрдүк медицинскэй көмөнү ылалларын туһунан СӨ доруобуйа харыстабылын министиэристибэтэ сайтыгар таһаарбыт.
Улууспут олохтоохторо, үрүҥ халааттаах аанньалларбыт ыра санаа оҥостубут баҕабыт туолар кэмэ чугаһаан эрэриттэн бары астынабыт.
Касьян ОЛЕСОВ-Олук