Икки күн «Триумф» кииҥҥэ «Азия оҕолоро» Норуоттар икки ардыларынааҕы VIII спорт онньууларын алыш көрүҥэр тустуу буолла. Олус интэриэһинэй уонна түргэн-тарҕан күрэхтэһии эбит.
Саха сирин сүүмэрдэммит хамаандатын Нам улууһуттан Ира Кейметинова, Эльвира Ефремова, Милена Гаврилова, Айыына Охлопкова, Кристина Васильева көмүскээтилэр, тренердэрэ Анджелика Парникова.
Анджелика Парникова, кыргыттарга Саха сирин аҕа тренерэ: «Бу көрүҥҥэ Саха сирин сүүмэрдэммит икки хамаандатыгар толору састаап оҥорон, 4 ыйааһыҥҥа – уопсайа 8 кыыһы кытыннардыбыт. Алыш быраабылата 6:0 очкуоҕа диэри эбит, онтон лаппаахытыгар (үс туочукаҕа) сытыары бырахтахха ыраас кыайыы буолар. Куртан илиитин араарбыт тустуук сэрэтии ылар, утарсааччытыгар 1 баал эбиллэр. Саха сирин сүүмэрдэммит хамаандатыгар Намтан 5 кыыс чиэстээхтик көмүскээтилэр».
От ыйын 3 күнүнээҕи хапсыһыы түмүгүнэн 40 кг ыйааһыннаахтарга Ира Кейметинова уонна 50 кг Милена Гаврилова 2-с миэстэ буолары ситистилэр.
«Мин Хамаҕатта орто оскуолатын үөрэнээччитэбин. Тустуунан дьарыктаммытын икки сыл буолла. Тренерим Анджелика Владимировна. Тустуу уонна алыш диэн олох атын атыттар эбит. Курдаһан тустуу син ыарахан», — диэн үрүҥ көмүс мэтээл хаһаайына Ира Кейметинова санаатын үллэһиннэ.
Алыш — Кыргыз норуотун национальнай тустуута буолар. Тустууктар халлаан күөҕэ уонна от күөҕэ өҥнөөх анал таҥастаахтар, систэригэр курданаллар. Спортсменнар утарыта туран (стойкаҕа) бэйэ-бэйэлэрин кэннилэриттэн курдарыттан тутуһан утарсааччытын (илиитин араарбакка эрэ) охторо сатыахтаах.
Семен Аргунов