Санкт-Петербург куоракка норуоттар икки ардыларынааҕы “Планета Искусств-2023” конкурс-фестивальга Нам улууһун П.П. Ядрихинскай-Бэдьээлэ аатынан Олоҥхо дьиэтин иһинэн тэриллибит «Эдэр Тэтим» фольклор ансаамбыла ситиһиилээхтик кыттан Саха сирин ааттатта.
Россия култууратын уонна искусствотын биллэр-көстөр деятеллэрэ Олоҥхо дьиэтин үлэһитэ Сандр Находкин өйүттэн-санаатыттан айан, чочуйан таһаарбыт композициятын үрдүктүк сыаналаабыттара Өрөгөйдөөх Кыайыыга тиэртэ!
“Нам улууһугар аан маҥнайгынан төрүт дорҕоону тарҕатааччы, сөргүтээччи оҕобут Сандр Находкин буолар. Инникитин даҕаны, Сандр Александрович салайааччылаах “Эдэр Тэтим” фольклор ансаамбыла Саха сирин дорҕоонноохтук ааттатыаҕа. Киэн туттар үлэһиппит Сандр сардаҥата сандаардын!” – диир Олоҥхо дьиэтин директора Вера Колпашникова.
Талааны таба көрөн киэҥ эйгэҕэ таһаарар туһунан сыралаах үлэнэн биллэр. Кэмигэр арыллыбакка хаалбыт талааннар үгүстэр. Эйиигин өйдүүр уонна өйүүр киһи аттыгар баар буолан искиттэн тахсары саас-сааһынан сөптөөхтүк аттаран, бэрээдэктээн күүс-көмө, сүбэ-ама буоллаҕына, иннин диэки кыайыылаахтык айанныыгын. Бу хайа да өттүттэн умнуллубатыгар баҕарабыт. Айар куттаах, биир санаалаах Олоҥхо дьиэтигэр уруй буоллун!
Ону тэҥэ, алтынньы 6-10 күннэригэр XVIII-с норуоттар икки ардыларынааҕы научнай-популярнай уонна чинчийэр киинэлэр “Мир знаний” фестивальга, Саха сирин уонна аҕыйах ахсааннаах норуоттар култуураларын, үгэстэрин, төрүт тылларын тустарынан кэпсиир «Кочующий музей» документальнай киинэ арыллыытыгар Сандр Находкин салайааччылаах «Эдэр Тэтим» фольклорнай ансаамбыл кыттыыны ылбытын директор Вера Колпашникова иһитиннэрэр. Бэлиэтээн эттэххэ, документальнай киинэ режиссера Мила Кудряшова РФ Гранын ылбыта этиллэр.
“Аан дойдутааҕы фестивальга кыттарбытыгар Саха сиринээҕи норуот муусукатын түмэлиттэн Обоюкова Варвара Валерьевна сүбэлээбитэ. Тута, Ленскэй нэһилиэк дьаһалтатын баһылыга Петр Сокольниковы кытта сүбэлэһэн, Россия 9 регионуттан 150-тан тахса кыттааччылаах, таһымнаах фестивальга композициябытын кыайыылаахтык көрдөрөн үрдүк ааты-суолу ыллыбыт, дойдубутугар аҕаллыбыт!
Бөлөххө былааччыйа, көстүүм тикпит Мария Федосееваҕа, Ленскэй нэһилиэк дьаһалтатын баһылыгар Петр Сокольниковка, фестивальга кытта барарбытынан дүҥүр бэлэхтээбит Намнааҕы киин балыыһа кылаабынай бырааһыгар Ариан Сергеевка, бэлиэ сирдэринэн экскурсия оҥорорбутугар күүс-көмө буолбут фольклорист, “Российский фольклорный союз” чилиэнэ, “Северный колорит” айымньылаах холбоһук салайааччыта, “Хороводы народов России” регионнааҕы координатора Варвара Обоюковаҕа олус диэн махтанабыт!” – диир Вера Васильевна.
Намнар Санкт-Петербурга Шереметевский Дворец сылдьаннар олус элбэх араас омуктар инструменнарын көрөн сөхпүттэр. Музейга Саха сириттэн эмиэ инструменнар баалларын көрөн үөрбүттэр. Бу күннэргэ кинилэр Искусства болуоссаттарыгар көрүөхтэрэ-истиэхтэрэ: Россиятааҕы этнографическай музей, Русский Музей, Грибоедов канал, Спас на крови, Михайловский сад, Невский проспект, Казанский собор. Салгыы, Дворец Екатерины (г. Пушкин), “Эдэр Тэтим” лицеистар Музейдарыгар ФД “Хороводы народов России” салайааччытын Ольга Жукованы көрүөҕэ.
2020 сыллаахха тэриллибит “Эдэр Тэтим” бөлөх туһунан кылгастык сырдаттахха. 2019 сыл муус устар 28 күнүгэр “Сандаар” төрүт дорҕоон бөлөҕүнэн бастаабыта; 2020 с. “Эр тыын” бөлөх республикатааҕы “Өбүгэ быстыбат ситимэ” күрэххэ бастаабыта. Кэмниэ кэнэҕэс, 2020 сыллаахха ансаамбыл олохтоохтук “Эдэр Тэтим” ааты ылынан, 2022 сылга республикатааҕы “Бриллиантовые нотки” Гран При хаһаайына буолбута; “Өбүгэ быстыбат ситимигэр” 1 истиэпэннээх лауреат ылбыта.
Намнааҕы П.П. Ядрихинскай-Бэдьээлэ аат. Олоҥхо дьиэтэ ханна да буоллар, хас биирдиигэ кыһамньытын уурарын, сырдык санааны тарҕатарын умнубат. Ол курдук, Санкт-Петербурга үктэнээт, госпиталга эмтэнии ааһа сылдьар байыаннай дьайыы кыттыылаахтарыгар тиэрдэргэ Санкт-Петербурга Саха сирин бастайааннай представительствотын сүрүн специалиһыгар Евгений Петровка сүөгэй, сливки, сугун сироптарын уонна Харысхаллары туттарбыт. Евгений Михайлович биир дойдулаахтарбытын истиҥник көрсүбүт, санаа атастаспыт уонна улуус баһылыгар Юрий Слепцовка махтанарын биллэрбит.
Ленскэй нэһилиэк пресс-киинэ