Нам улууһун “Олимпик” спорт оскуола иитиллээччилэрэ кикбоксаҕа Россияҕа бастыыр иһин чемпионакка үчүгэй таһым, көрдөрүү олохтоотулар. Ол курдук, Саввинов Маркел Россия иккис нүөмэрдээх кикбоксерынан ааттана үрүҥ көмүс мэтээл кэттэ. Габышев Ярослав уонна Ариан Попов бэйэлэрин ыйааһыннарыгар Дойду 6 бастыҥ кикбоксер иһигэр киирдилэр.
“Дагестан өрөспүүбүлүкэтигэр ыам ыйын 21 күнүгэр кикбокса чемпионата түмүктэннэ. Каспийск куоракка буолан ааспыт кикбоксаҕа Россияҕа бастыыр иһин күрэхтэһиигэ биһиги үс иитиллээччибит Саха сирин сүүмэрдэммит хамаандатыттан бэрт үчүгэйдик кииристилэр. Бастыҥ көрдөрүүнү рингэҕэ биэс көрсүһүүнү ааспыт Дмитрий Захаров иитиллээччитэ Саввинов Маркел аҕалла.
Кикбоксердарбытыгар кытаанах майгыны, үрдүк ситиһиилэри уонна норуоттар икки ардыларынааҕы “Азия оҕолоро” оонньууга үчүгэй көрдөрүүнү аҕалалларыгар баҕарабыт. Тренердэргэ Дмитрий Захаровка, Дмитрий Черноградскайга махтанабыт”, – диир дириэктэр Юрий Балаганскай.
Харысхан Попов