Бүгүн, ыам ыйын 22 күнүгэр, СӨ Правительствотын председателин солбуйааччыта Сергей Местников Нам улууһугар халаан уутуттан улаханнык эмсэҕэлээбит нэһилиэктэргэ үлэлээтэ.
Хатырык нэһилиэгэр М.К. Аммосов аатынан Хатырык орто оскуолатыгар тэриллибит быстах олорор пууҥҥа баар олохтоохтору кытта көрсүстэ. Тиэргэннэрэ, дьиэлэрэ-уоттара, хаһаайыстыбаннай тутуулара, техникалара, хотонноро олорчу ууга барбыт, сүөһүлэрин имири ууга былдьаппыт «Толоон» бааһынай хаһаайыстыба салайааччыта Александра Слепцова, кэтэх хаһаайыстыбалаах Антонина Суханова, Надежда Шадрина уо.д.а. көрсүбүт кыһалҕаларын иһитиннэрдилэр. Кэпсэтиигэ оробуочай бөлөххө тэҥҥэ сылдьыһар СӨ тыатын хаһаайыстыбатын, аска-үөлгэ политикатын миниистирэ Артем Александров, СӨ ветеринарияҕа Управлениетын начальнигын солбуйааччы Виктор Семенов, кинилэри арыаллыыр «Нам улууһа» МТ баһылыгын тыа хаһаайыстыбаҕа солбуйааччы Филипп Николаев, Нам улуустааҕы ветеринарнай управление начальнига Прокопий Окоемов кыттыстылар. Ыйытыыларга хоруйдары, быһаарыылары биэрдилэр. Сиэрдээх кэпсэтии таҕыста. Түмүгэр Сергей Васильевич барыта болҕомтоҕо ылыллан, Ил Дархан дьаһалыгар олоҕуран, хоромньу ааҕыллан, түмүллэн, өйөбүл, көмө оҥоһуллара чопчуланарын быһаарда. Кинилэр салгыы «Толоон» бааһынай хаһаайыстыба ууга ылларбыт базатын: хотоннорун, кыбыылары, даллары көрдүлэр.
Бу оробуочай бөлөххө киирбит СӨ култуураҕа, духуобунай сайдыыга миниистирэ Афанасий Ноев, СӨ физическэй культуураҕа, спортка миниистирэ Леонид Спиридонов олохтоохтору, бэйэлэрин эйгэлэрин үлэһиттэрин кытта көрсөн кыһалҕаларын, санааларын иһиттилэр, эбийиэктэри көрдүлэр, ол иһигэр ууга барбыт спортивнай площадкалары.
Таарыччы аҕыннахха, Хатырыкка намыһах сирдэргэ халаан уута олорон хаалбыт. Билигин да хааламмыт уу бөһүөлэги аҥардаан сэниэлээхтик сүүрүгүрэр, суолу-ииһи алдьаппыт, сырыыга күчүмэҕэйдэр бааллар.
Олохтоох дьаһалтаҕа иһитиннэрбиттэринэн, халаан уутун содулун туоратыыга күүстээх үлэ барар. Дьон-сэргэ дьиэлэрин-уоттарын өрө тардынар, таҥастарын-саптарын куурдунар. Бөһүөлэк иһигэр СӨ «Быыһыыр сулууспа» 20 киһилээх, МЧС СПЧС сулууспатын 19 киһилээх биригээдэлэрэ, ХИФУ «Эдэр гвардия» 15 устудьуона, олохтоох тэрилтэлэр 100 %-н, общественнай түмсүүлэр ыраастаныыга, сааһылааһыҥҥа хотуулаахтык үлэлииллэр. Ууну оботторууга, бырахтарыыга КАМАЗ-ПВС анал техникалаах үлэһиттэр улахан көмөнү оҥороллор. «Бурлак» вездеход 4 киһилээх биригээдэтэ Хатырык-Маймаҕа икки ардыгар түүннэри-күннэри дьону таһар, элбэх кыһалҕаны быһаарар. Манна суолу халаан уута хайа сүүрбүт сиригэр сотору өрөмүөн үлэтэ барыахтаах. Гаас тэрилтэтин үлэһиттэрэ техническэй өттүнэн эппиэттиир дьиэлэргэ гааһы холбууллар. Гуманитарнай көмө күүскэ кэлэ турар.
Бүгүн Хатырыкка быстах олорор пууҥҥа Дьокуускайтан «Мои документы» киин специалистара үлэлииллэр. Бу күннэргэ Мария Анисимова, Вера Варламова ыксаллаах быһыы түмүгэр бастакы наадалаах малы сүтэрии иһин биир кэмнээх материальнай көмөнү ылыыга барыта 111 кыһалҕалаахха сүбэ-ама биэрбиттэр, «Госуслуги» сайт нөҥүө докумуоннары туттарыы өҥөтүн оҥорууга 45 киһиэхэ көмөлөспүттэр. Онтон Россия ИДьМ «Якутскай» МУ паспортнай сулууспатын инспектора Нарыйаана Захарова бастакы күҥҥэ 10 киһиттэн паспоры уларытыыга докумуоннары туппут, бүгүн 3 киһиэхэ оҥоһуллубут паспордарын туттарбыт. СӨ Нам оройуонугар Россия социальнай фондатын управлениетын кылаабынай специалиһа Петр Дыдаев 8 киһиэхэ «Госуслуги» сайт нөҥүө пенсионер свидетельствотын, дастабырыанньатын ылыыга, босхо айан бырайыаһынан туһаныыга, ыксаллаах быһыыга көрүллэр биир кэмнээх көмөҕө сайабылыанньаны ылыыга о.д.а. өҥөлөргө көмөлөспүт. Дьокуускайдааҕы өрөспүүбүлүкэтээҕи харах балыыһатын көһө сылдьар медицинскэй пуунун специалистара олохтоохтору көрөн туһалыы сылдьаллар. Бу тэрилтэлэр үлэһиттэрэ олохтоохтор кыһалҕаларын чэпчэтэн, дьон-сэргэ санаатын көтөҕөллөр.
Оробуочай бөлөх кыттыылаахтара Маймаҕаҕа тиийэн, КСК-ҕа быстах олорор пууҥҥа олохтоохтору кытта көрүстүлэр. Нэһилиэк баһылыга Александр Егоров балаһыанньаны сырдатта. Тыа хаһаайыстыбатыгар үлэлиир ИП Татьяна Слепцова сылгылара барыта ууга былдьаммытын иһитиннэрдэ, көрсүбүт хоромньутугар өйөбүлү ыйыталаста. Маймаҕа оскуола-сад дириэктэрэ Сахаяна Лукина үөрэх үс эбийиэгэ ууга тимирбитин, үөрэх тээбиринэ, тэрилэ, мала-сала, кинигэлэрэ, оонньуурдара барыта ууга былдьаммытын, ыарахан балаһыанньа үөскээбитин этэн туран, көмө көрүллэригэр санаатын тиэртэ. Сардана Андросова, Ньургуйаана Лебедева көрсүбүт кыһалҕаларын – тутта сылдьар саҥа дьиэлэрин ууга ылларбыттарын эттилэр. СӨ Правительствотын солбуйааччы Сергей Местников, тустаах миниистирдэр хас биирдии киһи кыһалҕатын болҕомтолоохтук истэн, ыйтыыларга хоруйдаан, налыччы кэпсэттилэр. Сергей Васильевич хатырыктарга эппитин курдук, халаан уутун содулуттан тахсыбыт хоромньу ааҕыллан, көмө, өйөбүл механизма чуолкайданарын быһаарда. Кинилэр салгыы оскуола-сад эбийиэктэрин, олохтоох ФАП дьиэтин көрдүлэр.
Бөтүҥ нэһилиэгэр оробуочай бөлөх кыттыылаахтара тыа хаһаайыстыбатыгар үлэлиир урбаанньыттар, бааһынай хаһаайыстыбалар кыһалҕаларын истэн, болҕомтоҕо ыллылар. СӨ Правительствотын председателин солбуйааччы Сергей Местников Нам улууһугар үлэтин түмүгүнэн, салгыы үрдүкү таһымҥа анал үлэ чопчуланарын мэктиэлээтэ.
Касьян Олесов-Олук