Нам сэлиэнньэтигэр киһи сүрүн-кутун баттыыр былыттаах күн-дьыл турбута, хаар хойуутук түспүтэ балачча хонук буолла. Онуоха, суолга техника, сатыы киһи куттала суох сылдьарыгар хаары ыраастыыр үлэлэр тохтоло суох ыытыллаллар да…
Дьон этиитэ:
“Суолу астарбатахтара ордук курдук, модьоҕо оҥорон баран хаалларан кэбиһэллэр, намыһах массыыналар ыйана сылдьаллар. Поликлиника иннэ”.
“Манна маҕаһыын иннин эмиэ күрдьэн баран хаалларан кэбиһэллэр”.
“Уулуссаҕа хаары астарбыт хаардара тротуарга, уулусса кытыытыгар модьоҕо буолан сытар, чуолаан, поликлиника иннигэр, “Светлана” маҕаһыын аттыгар автобус тохтобулун аттыгар, кырдьаҕас, ыарыhах дьоҥҥо, оскуола оҕолоругар кутталлаах, массыынаҕа киирэн биэриэхтэрин сөп, тоҕо бу уулусса икки өттүгэр мунньуллубут модьоҕону ыраастаабаттарый?”.
Нам сэлиэнньэтин киин суоллара өрөспүүбүлүкэ көрүүтүгэр киирэллэрин Ленскэй нэһилиэк баһылыга Петр Сокольников этэр. Поликлиниканан, уһуйаанынан ааһар киин суоллары “Уйгу-Быйаҥ” ХЭТ тэрилтэ көрөр-истэр.
“Күн бүгүҥҥэ диэри хаардаан бүтэр сибики көстүбэт. Модьоҕону тиэйии саҕаланыаҕа. Суол кытыытыгар хаалбыт модьоҕолору тиэйэргэ аны массыыналар мэһэйдии тураллара үлэни атахтыыр. Тэрилтэҕэ үлэһит илии тиийбэт”, – диэн быһаарар “Уйгу-Быйаҥ” ХЭТ салайааччыларыттан биирдэстэрэ Владимир Сивцев.
Харысхан Попов
📹Роман Шапошников