Дойду Президенэ Владимир Путин көҕүлээбит «Социальнай гаастааһын» программатын олоххо киллэриигэ туһуламмыт уурааҕын чэрчитинэн, Нам улууһугар иккис сылын үлэ тиһиктээхтик ыытыллар. «Социальнай гаастааһын» бырайыага гаас ситимэ тиийбит нэһилиэнньэлээх пууннарыгар эрэ үлэлиир соруктаах.
«Сахатранснефтегаз» АУо гаас ситимин тардыы управлениетын Намнааҕы учаастагын начальнига Андрей Новгородов иһитиннэрбитинэн, 2023 сыллаахха уопсайа 98 дуогабар оҥоһуллубут. Ол курдук, Үөдэйгэ — 3, 1 Хомустаахха — 9, Партизаҥҥа — 1, Никольскайга — 5, Хамаҕаттаҕа — 21, Намҥа — 34, Аппааныга — 8, Граф Биэрэгэр — 1, Бөтүҥҥэ — 3, Модукка — 5, Хатырыкка — 3, Маймаҕаҕа — 1, Таастаахха — 3, Искраҕа — 1. Ити этиллибит 98 дуогабар СӨ Промышленноска министерствотын былааныгар киирбититтэн 89-гар илии баттаммыт. Онтон хаалбыкка үлэни салгыы ыыталлар.
Бу сылга сүрүн гаас ситимиттэн 26 утаҕы ыытарга былааннаахтар, онтон, билиҥҥи туругунан, 18-һа дуогабардаах, газопроводы киллэриигэ 45-тэн 30-гар дуогабардаах. Дьиэҕэ гаас киирэригэр бэлэм турар 5 туруору атахха холбонуохтааҕыттан 4-гэр илии баттаммыт, ааспыт сыл үлэтин салгыырга 7 атах баар.
«Социальнай гаастааһын» программатын дуогабарыттан 94-гэр бырайыак оҥоһуллубут, 67 докумуон куонкуруһу ааспыт, онно эбии 5 дуогабар быһа түһэрсиллибит. Программманы олоххо киллэрэргэ тутар-монтажтыыр 24 үлэни ыыппыттар, инникитин 15 былааҥҥа турар.
Гаас утаҕын тардыынан «Стандарт 14», «Ибком», «Газэксперт», «Стройуниверсал», «Намгазстрой» ПМК хааччахтаммыт эппиэтинэстээх тэрилтэлэр дуогабардаһан үлэлииллэр. Онтон дьиэҕэ киллэриигэ тас уонна ис өттүнээҕи үлэтин дьиэ хаһаайына бэйэтэ бырайыак оҥорторон киллэртэрэр.
Дьоҥҥо-сэргэҕэ олус туһалаах маннык программалар олоххо киирэллэрэ кэрэхсэбиллээх. Гаастаах улуус буоларбыт быһыытынан усулуобуйа тэриллэрэ баар буолла. Саҥа кварталларга, нэһилиэктэн тэйиччи турар дьиэлэргэ маһынан, чоҕунан оттон олорбут ыаллар кэтэһиилээх күөх төлөҥҥө көһүүлэрэ дьол буоллаҕа.
Инникитин программаны хото туһаныыга, олоххо киллэриигэ саҥа кварталларга, нэһилиэк кытыытынааҕы түөлбэлэргэ элбэх дьиэ тутулуннаҕына, үп көрүллэригэр көдьүүстээх буолара саарбахтаммат. Нэһилиэктэн ойуччу турар икки-үс дьиэҕэ баһырхай суумалаах үлэни ыытар табыгаһа суох буоларын бары өйдүөх тустаахпыт.
Семен Аргунов