Хамаҕатта нэһилиэгин Тускул уһуйаан «Сулусчаан» бэлэмнэнии бөлөҕүн иитиллээччилэрэ сонун быыстапка туруордулар. Ол курдук, бөлөх оҕолоро тугу мунньалларын көрдүбүт.
Коллекциялааһын оҕону харыстанньаҥ буоларга, мал туохха туттулларын, туохтан оҥоһуллубутун билэргэ, иитэр да үөрэтэр да суолталаах. Дьэ, араас барыта баар эбит. Ол курдук, сахалар мааны иһиппит — чороон арааһа — Павлова Санаайа, кэмпиэт суулара — Кобяков Айтал, кумааҕы харчылар — Михайлов Эрсан.
Олус элбэх пазл Дамир мунньубут, барылара хоруопкалаах, биири да сүтэрбэккэ харыстаан илдьэ сылдьар, таҥарын сөбүлүүр. Спиридонова Каталина киндер, Уваровская Дайаана роблокс бытархай оонньуурдарын балачча мунньубуттар. Атласов Айтал уол оҕо барыта оонньуур, сөбүлүүр кырачаан массыыналардаах эбит.
Васильев Стас — магниттар. Кириллина Каролина ытарҕа, заколка араас көрүҥүн, Барашков Платон магниттары, Олесова Милия куукулалары, араас статуэткалары мунньаллар.
Дмитриев Миша дьиэ кэргэнэ бэрт интэриэһинэй дьарыктаахтар эбит. Ол курдук гипсэттэн араас кашполары, шкатулкалары, сувенирдары оҥорбуттарын сэҥээрдибит. Дьиэ кэргэн бизнеһэ да буолуон сөп эбит.
«Сулусчаан» төрөппүттэрэ оҕолорун коллекциялааһыҥҥа маҥнайгы хардыы оҥороллоругар көмөлөстүлэр. Бары олус көхтөөхтүк кыттыыны ыллылар. Ити курдук иитээччилэр Зинаида Александровна, Саргылана Руслановна, төрөппүттэр биир сүбэнэн үлэлииллэрин бэлиэтиибит.
Маргарита Охлопкова