Нам улууһун Бөтүҥ нэһилиэгин олохтооҕо Михаил Илларионович Софронов быырпаҕын «Суобас» диэн ааттаан, бытыылкатыгар төлөпүөнүн нүөмэрин суруйан суолга таһааран ууран атыылыыр сонун ньыматын бүтүн өрөспүүбүлүкэ сэргээтэ. Биһиги Михаил Илларионовиһы кытта кэпсэттибит.
Михаил Софронов, «Суобас» быырпах атыылааччыта:
Бу күһүн, сир өссө хара эрдэҕинэ, быырпаҕым ордон хаалбытыгар суруктаан-бичиктээн иккитэ-үстэ трассаҕа таһааран уурбутум. Ылан бараллара. Билигин атыы-кутуу төлөбүрэ барыта мобильнай баан нөҥүө барар буолла. Уу харчынан төлөһөөччү олох аҕыйах. Ол иһин маннык ньыманы олохтообутум. Быырпахпын суолга таһааран уурбутум тухары босхо быырпах биир да барбата, барытын төлөөн иһэллэр. Биир эмит босхо бардаҕына даҕаны, мин олох санаабын түһэрбэппин. Баҕар, кырдьаҕас киһи түбэһиэн сөп, мобильнай баана суох о.д.а. эбэтэр олох харчыта суох. Ол ыллын ээ, мин быырпахпын истэҕинэ, баҕар, дуоһуйан санаата көнньүөрүө диэн санаалаахпын. Арай биир түгэҥҥэ икки быырпаҕым олох сүтэн хаалбыта. Үгэспинэн наадыйбатым. Чугастааҕы маҕаһыыммар тахсыбытым, ол икки быырпаҕым харчытын мобильнайынан кыайан төлүүр кыахтара суох буолан, маҕаһыыҥҥа аҕалан хаалларбыттар эбит. Онон ол икки быырпаҕым төлөммүтэ.
Нэһилиэк улахан тэрээһиннэригэр, ыһыахтарыгар быырпаҕы миэхэ сакаастаан оҥортороллор. Онон быырпах оҥоруутунан дьарыктаммытым ыраатта. Ийэм быырпахчыт этэ, былыр кымыс оҥороро. Киниэхэ ыһыахтарга анаан оҥортороллор этэ. Туоннанан оҥороро, үүт массыынатынан кэлэн оборторон ылаллара. Уутун оргутааччы, сойутааччы барытыгар мин этим. Ийэм сорудаҕынан көмөлөһөрүм. Быырпаҕы оҥорорго анаан үөрэппэтэҕэ эрээри, оҕо сылдьан көмөлөспүппүттэн өйбөр хаалбыт. Билигин онон сирдэтинэммин быырпахпын оҥоробун. Урут ууну барытын оргутар эбит буоллахпытына, билигин бэлэм ыраастаммыт уу баар буолан абыраатылар, уу оргуппаппын. Кырдьан, мөлтөөн-ахсаан хаһаайыстыбабын эспитим эрээри биир ынахтаахпын, онон үүтүм тиийэр. Быырпах оҥоруутугар элбэх үүт барбат, дьиҥэр, сэкириэтэ элбэх. Кымыһы дьоҥҥо сакааһынан сылы быһа оҥоробун.
Лена Ноговицына