Бу сарсыарда сыбаалка буруотун сытынан уһугуннубут. Нэһилиэнньэ доруобуйатыгар охсуулаах буруоны хайдах суох гынар туһунан Петр Сокольников, Ленскэй нэһилиэк баһылыга:
Сыбаалка буруотун суох гыныы болҕомтоҕо турар. Дьон өйдүөхтээх! Төһө да сүрэх баҕатынан биирдэ суох гыныаххын баҕарбытыҥ иһин, үлэһит эт илиитинэн умулларар, салалта киһи курдук эт өйүнэн тобула сатыыр.
Кини кутаа уотун курдук судургутук биир-икки күнүнэн умуллубат. Быһаччы этэбин, техника 2 м кэриҥэ дириҥнээх сиргэ батары түһэр кутталлааҕынан, билиҥҥитэ сатаан киирбэккэ турар. Буруо нэһилиэнньэҕэ буортулаабатын туһугар, бүгүҥҥү күҥҥэ үлэһиттэр күн тохтоло суох сыбаалка сиригэр-уотугар тахсаллар.
Сыбаалка буруотунан сибээстээн, Нам сэлиэнньэтигэр уонна Аппааныга Роспотребнадзор управлениетын Намнааҕы салаата салгын баттааһыныгар мониторинг ыытар.
Салгыны буортулуур эттиктэри лаборатория чинчийиитэ көрдөрөрүнэн, буруо гигиеническэй нуорманы кэспэт, кутталы үөскэппэт. Мониторинг үлэтэ, чинчийии салгыы ыытыллар.
Роспотребнадзор нэһилиэнньэҕэ сүбэлиир:
— Таһырдьа, буруо турбут салгыннаах сиригэр уһуннук сылдьыбаккытыгар;
— газированнай утаҕы иһиэххит оннугар, минеральнай ууну иһэргит туһалаах;
— битэмииннээх астары аһааҥ;
— аһары хамсаммаккытыгар;
— буруолаах сиргэ мааскалаах сылдьыҥ;
— дьиэҕитин күн ахсын сииктээх тэрээпкэнэн сото сылдьыҥ.