Сыбаалка дьон дьалаҕай туттуутуттан умайар

Нам сэлиэнньэтин сиригэр-уотугар киирэр сыбаалка кыһыннары-сайыннары буруолаата, дьону тумнарда. Манна аҥаардас сэлиэнньэ бөҕө-сыыһа тахсыбат.

Улуус үгүс нэһилиэктэрин хааччыйар “Якутскэкосети” тэрилтэ бөҕү чуо-бааччы бу сыбаалкаҕа аҕалан кутар. Оччотугар, сыбаалка Ленскэй нэһилиэк олохтоох дьаһалтатын эрэ көрүүтүн эбээһинэһигэр киирбэт. Сыбаалка харабыла үлэтин чааһа – 9.00-20.00 чч.

Сайын, кыһын буруонан тыынар тулуйарыттан ааспыт нэһилиэнньэ этиитэ:

  • Бу этиллибиккэ мин сыбаалка боппуруоһа хайдах да кыаллыбат кытаанах боппуруос диэм этэ. Кыһыннары-сайыннары дьон дьааттаах салгынынан тыынан, төһөлөөх ыарыһах киһи, оҕо ыарыыта бэргээн, сорох доруобай да дьону сүһүрдэ олороллор. Өссө хас сыл дьааттаах буруонан тыынабыт. Бу дьону эрэ буолбакка сири, салгыны, ууну эмиэ сүһүрдэллэр.  Манна ким кыһаллыахтааҕый, хамсатыахтааҕый, СанЭпид дуу, прокуратура дуу, салалта дуу? Биһиги боростуой дьон этэ сатыырбыт бостуой салгыҥҥа ыйанан хаалар;
  • Дьиэ иһигэр тиийэ киирэр ээ, чахчы. Бүтүннүү пластмас умайбыт сыта.
  • Тоҕо умайарын тохтоппоттор, оҕолор күөмэйдэрин сиэн эрэр дии, үөрэхтэн тохтоотулар.
  • Дорооболоруҥ, бу сыбаалка бөҕүн тоҕо уматалларый? Аһыы, туох-туох умайбыт буруота кэлэрэ биллибэт. Экология, Роспотребнадзор тоҕо хонтуруоллаабаттарый? Чааһынай ыал кыра бөҕүн уматарын экологияны буорту гынаҕыт диэн ыстарааптаары хаайаллар, куттууллар. Оттон бүтүн улуус бөҕүн хомуйан аҕалан манна уматаллара сөп эбит дуу… Астмалаах оҕо, улахан да дьон эрэйи көрөллөр ээ?! доруобуйаҕа буортулааҕа биллэр ээ?!

Петр Сокольников, Ленскэй нэһилиэк баһылыга:

Сыбаалка тохсунньу 24 күнүттэн умайан саҕалаабыта. Биричиинэтэ чуолкайданар. Ол эрээри, дьон соруйан да буолбакка, алҕас да уоттуура улахаҥҥа тиэрдэрин өйдөөбөт. Бүгүҥҥэ күҥҥэ умайыы тохтотулунна, эрээри… Сыбаалка олох түгэхтэн, алларааттан умайар буолан, күн бүгүҥҥү диэри көрдүгэннээн буруо таһаара сытар. Манна Ленскэй нэһилиэк олохтоох дьаһалтатын иһинэн үлэлиир МАУ АРТ бары күүһүн уурар.

Аны туран, тыал хайысхата бу күннэргэ арҕааттан ылан нэһилиэккэ киллэрдэ. Кыһын салгын баттааһына улахан буолан, буруону үөһэ таһаарбат.

Ол курдук, саҥа сыбаалка миэстэтин быһаарарга улуус салалтатын кытта тэҥҥэ үлэлэр ыытыллаллар. Билигин нэһилиэктэн 5 км тэйиччи сиргэ саҥа сыбаалка тутуута быһаарыллар. Улуус нэһилиэктэрин сыбаалката манна кутулларынан уустуктардаах.

Харысхан Попов

Читайте дальше