“Сыдьаайа” түмсүү буойуттарга таҥас тигиитин күүһүрдэр

Өрөспүүбүлүкэтээҕи баҕа өттүнэн “Илии сылааһа” ийэлэр иистэнэр сыахтарын Хатыҥ Арыытааҕы филиала “Сыдьаайа” түмсүү байыаннай дьайыыга кытта сылдьар буойуттарга анаан байыаннай таҥас тикпиттэрэ лоп курдук иккис сыла буолла.

Түмсүү салайааччыта Дария Мальцева иһитиннэрбитинэн, 2024 с. олунньу 14-17 күннэригэр Аҕа дойдуну көмүскээччилэр күннэрин көрсө өрөспүүбүлүкэтээҕи күрэхтэһиигэ кыттан 2 бочуоттаах миэстэни ылан промышленнай массыынаннан наҕараадаламмыттара. Бу саас Бөтүҥ нэһилиэгин иистэнэр ийэлэригэр байыаннай таҥаһы тигиигэ маастар кылаас ыытаннар, Бөтүҥ түмсүүтэ эмиэ билигин күүскэ үлэлии олорор. Онтон сиэттэрэн, аны бөтүҥнэр бу күһүн Хатырык нэһилиэгин иистэнньэҥнэрин үөрэтэн үлэ салҕанар.

Иистэнэр сыах Кыһыл Дэриэбинэ “Сайдыы” сынньалаҥ киинигэр үлэлиир. Иистэнэр сирдэрэ сып-сылаас, сып-сырдык буолан үлэлэригэр күүс биэрэр, сынньалаҥ киин салайааччытыгар Винокурова Айталина Гаврильевнаҕа  махталлара муҥура суох. Арай Аппааныттан иистэнэр сирдэрэ тэйиччи буолан сарсыарда баралларыгар, киэһэ кэлэллэллэригэр ыарахаттары көрсөллөр. Дария Ивановна кэргэнэ Гаврил Семенович массыынатынан таһан, тикпит таҥастарын куоракка сыахха киллэрэн көмөтө баһаам.

Иистэнньэҥ кыргыттар тиһигин быспакка үлэлээн быйылгы сыл устата 790 устуука байыаннай таҥас араас көрүҥүн тигэн куоракка киллэрэн “Илии сылааһа” сыахха туттардылар. Ол иһигэр бу сэтинньи, ахсынньы ыйдарга бэйэбит улууспутуттан байыаннай дьайыыттан сынньалаҥнарыгар кэлэ сылдьар 5 уолу таҥыннаран, ийэлии сылаас тылларынан алҕаан ыыттылар. Филиал үлэтэ үчүгэй түмүктэрдээх буолан Дария Ивановна, Мария Петровна ыам ыйыгар “За оказание помощи участникам СВО” диэн түөскэ анньыллар бэлиэнэн наҕараадаламмыттара.

Надежда Сивцева

Читайте дальше