Нам улууһун Хатыҥ Арыы нэһилиэгиттэн Дария Ивановна Мальцева салайааччылаах «Сыдьаайа» иистэнньэҥнэр бөлөхтөрүттэн Мария Петровна Кривошапкина, Валентина Спиридоновна Сивцева, Галина Ревовна Суханова, Варвара Дмитриевна Слепцова «Илии сылааһа» республикатааҕы күрэххэ кытталлар.
Тохсунньу 30 күнүттэн олунньу 2 күнүгэр диэри, түөрт күн устата, күн күбэй ийэлэрбит сылаас илиилэринэн 2 истээх куурка, 1 истээх жилет, 3 халыҥ флис куурка, 3 х/б көстүүм, 1 х/б китель, 5 тактическай ырбаахы, 4 нательнай компилиэк, 4 футболка, 10 бэргэһэ, 6 снуд, 3 балаклава, 3 куллуку, 3 мөһөөччүк тиктилэр.
Дьокуускайтан сыахтан кэлбит миэтэрэнэн таҥастар Галина Суханова сатабыллаах илиитинэн ньэмиэттэнэн быһылыннылар. Тигиллибит таҥастары куоракка иистэнэр сыахха дьүүллүүр сүбэҕэ киллэрэн туттарыахтара.
Бүгүн үһүс төгүлүн ыытыллар «Илии сылааһа» республикатааҕы күрэх 1 түһүмэҕэ түмүктэннэ. 13 улуустан 37 хамаанда кыттыыны ылла.
Нам улууһун Хатыҥ Арыы нэһилиэгин аатыттан күрэххэ 2-с сылларын толлубакка кытталларынан киэн туттабыт уонна олунньу 14-17 кк. ыытыллар күрэх иккис түһүмэҕэр ситиһиини баҕарабыт.
Надежда Сивцева