Хамаҕатта олохтоох библиотекатыгар Саргылана Колесова уонна Ангелина Ядреева алтынньы 28 күнүгэр тренд буолбут дьиэни киэргэтэр гиипсэттэн оҥоһукка маастар-кылаас ыыппыттар.
Оскуола үөрэнээччилэригэр сынньалаҥ кэмэ буолан, үгүс ийэ оҕотунаан хото кэлбитэ. Бэлиэтээн эттэххэ, Хамаҕатта олохтоохторо Саргылана Колесова уонна Ангелина Ядреева бу хаһыс да маастар-кылаас ыытыылара буолар эбит. Ол курдук, бу күн хамаҕатталар гиипсэнэн оҥоһукка үс бөлөх буолан маастар-кылаас ылбыттар. Оҕолор, ийэлэр, эдьиийдии-балыстар саҥаны билэн, дьиэ тупсаҕай көстүүлээх буоларыгар бэйэ илиитин сылааһынан 4-түү оҥоһук оҥорон таһаарбыттар.
Ангелиналаах Саргылана бэйэлэрин дьоҕурдарын сайыннаран, сатыылларын дьону кытта үллэстэллэр. Бу курдук өссө да кэрэни айа, сырдыгы саҕа, үтүөнү үллэстэ сылдьыҥ диэн баҕа санаалабытын тиэрдэбит.
Марина Корякина