Бүгүн Нам улууһун Модутугар «Уһук Илиҥҥэ 1000 тиэргэн» федеральнай программанан дьоҕус-паарканы үөрүүлээх быһыыга-майгыга астылар.
Удьуор уус быстыбат ситимин олохтооччу дьиэ кэргэн буолар. Ханнык баҕарар омук дьиэ кэргэни өрө тутар буолан, норуот чөл туруктаах, сырдыкка, үтүөҕэ тардыһар диэн санаанан салайтаран, төрөөбүт түөлбэ сайдыытыгар, дьоҥҥо-сэргэҕэ кыһамньыны туоһулаан пааркаларын «Матери и ребенка» диэн ааттаабыттар.
Дьоҕус-паарка проегын авторынан архитектор идэлээх Дайаана Егорова буолар. Кини нэһилиэк олохтоохторун, улахан кылаас үөрэнээччилэрин кытары бииргэ үлэлэһэн санаа атастаһан, баҕаларын учуоттаан проектаабытын «Накатс» ХЭТ (ген. директор Валерьян Кучутов) тутан, оҥорон олоххо киллэрдэ. Манна кыра оҕотуттан саҕалаан оонньуулларыгар, сынньаналларыгар, ыччат түмсэригэр, аҕам саастаахтар ирэ-хоро олорон кэпсэтэллэригэр олус табыгастаах миэстэ буолара саарбаҕа суох. Бүгүн халлаан дьыбарын аахсыбакка уһуйаан иитиллээччилэрэ, оскуола үөрэнээччилэрэ, олохтоохтор, ыҥырыылаах ыалдьыттар кэлэн үөрүүлэрин үллэһиннилэр.
«Нэһилиэкпит тупсуутугар, дьоммутугар-сэргэбитигэр сынньалаҥы тэрийиигэ улахан сүүмэрдээһини ааспыппыт. Ол курдук, муниципальнай тэриллиилэртэн уопсайа 85 сайаапка киирбит этэ, онтон 11 проект ааспыта. Тыа сирин нэһилиэктэригэр көрүллүбүт 4 квота иһигэр киирэммит үөрүүбүт үгүс. Бары бииргэ үлэлэспит тустаах тэрилтэ үлэһиттэригэр махталбытын биллэрэбит», — диэн нэһилиэк баһылыга Ефим Гоголев үөрүүтүн үллэһиннэ.
Санатан эттэххэ, Саха сиригэр 2022 сылтан дьон олоҕун хаачыстыбатын уонна таһымын үрдэтиигэ туһуламмыт «Уһук Илиҥҥэ 1000 тиэргэн» программа ситиһиилээхтик үлэлиир. «Нам улууһа» МТ биир кэлим сакаасчыт сулууспатын директорын э.т. Алексей Кондаков Нам улууһугар бу программанан уопсайа 5 мини-паарка тутуллубутун туһунан эттэ.
Семен Аргунов