Муус устар 10-11 күннэригэр Дьокуускай куоракка эбии үөрэхтээһин эйгэтин педагогтара идэлэригэр үрдүк маастарыстыбаларын арыйар сылын аайы тэриллэр Бүтүн Россиятааҕы «Сүрэҕим сылааһын оҕолорго аныыбын» куонкурус өрөспүүбүлүкэтээҕи түмүктүүр түһүмэҕэ ыытылынна. Бу куонкурус 1988 сылтан эбии үөрэхтээһин идэтигэр умсугутууну үөскэтэр, бастыҥ педагогу арыйар уонна эбии үөрэхтээһин ситиһиилээх, кэрэхсэбиллээх үлэтин булууга сыаллаах тэриллэр.
Бу суолталаах түһүмэххэ өрөспүүбүлүкэ эбии үөрэхтээһинин 43 бастыҥ педагога 8 хайысханан анал ааты ылыыга кытынна. Нам улууһун чиэһин Елена Карамзина-И.С. Гаврильев аатынан Нам 1 №-дээх ОО, Иннокентий Татаринов-З.П. Саввин аатынан Үөдэй ОО, Анастасия Иванова-Модут ОО уонна Надежда Протопопова-«Олимпик» спортивнай оскуола» эбии үөрэхтээһиннэрин педагогтара көмүскээтилэр.
Түмүктүүр күрэх кыттааччылара идэ таһымын, маастарыстыбаны арыйыыга аһаҕас дьарыгы көрдөрөн, «Твой путь к самореализации и успеху» маастар-кылааһы ыытан уонна «Сетевая интеграция в дополнительном образовании» утары айар куонкуруска киирсэн тургутустулар. Ол түмүгүнэн анал ааттары ылан кыайбыттар, хайысха аайы 2-с, 3-с бириистээх миэстэлэргэ киирбиттэр быһаарылыннылар:
-«Техническэй хайысхаҕа эбии үөрэхтээһин бастыҥ педагога»: 1 м. – Николай Гоголев, Үөһээ Бүлүү улууһун «Оҕо технопарката» эбии үөрэхтээһин тэрилтэтин педагога, 2 м. – Иннокентий Татаринов, З.П. Саввин аатынан Үөдэй ОО технологияҕа учуутала, 3 м. – Светлана Цыпандина, Дьокуускай куорат эбии үөрэхтээһин «Техническэй айымньы киинин» ыстаарсай педагога.
-«Естественнэй хайысхаҕа эбии үөрэхтээһин бастыҥ педагога»: 1 м. – Нюргустана Иванова, Сунтаар улууһун «Б.Н. Андреев аатынан Элгээйитээҕи региональный музейнай-экологическай киин» эбии үөрэхтээһинин педагога, 2 м. – Елена Карамзина, И.С. Гаврильев аатынан Нам 1 №-дээх ОО эбии үөрэхтээһинин педагога, 3 м. – Мария Томская, Амма улууһун «Амматааҕы эдэр натуралистар станцияларын» эбии үөрэхтээһинин педагога.
-«Физкультурнай-спортивнай хайысхаҕа эбии үөрэхтээһин бастыҥ педагога»: 1 м. – Павел Алексеев-Стасов, Хаҥалас улууһун «Хаҥаластааҕы оҕо спортивнай оскуолата» эбии үөрэх тэрилтэтин тренер-преподавателэ, 2 м. – Николай Павлов, «Чурапчытааҕы оҕо спортивнай оскуолата» эбии үөрэхтээһин тэрилтэтин тренер-преподавателэ, 3 м. – Надежда Протопопова, Нам улууһун «Олимпик» спортивнай оскуола» эбии үөрэхтээһин тэрилтэтин педагога.
Ол туһунан Нам улуустааҕы үөрэх управлениетын иитии уонна эбии үөрэхтээһин отделын кылаабынай специалиһа Юлия Жергина иһитиннэрдэ, улууспут эбии үөрэхтээһин тэрилтэлэрин педагогтарын үрдүк ситиһиилэринэн эҕэрдэлээтэ.
Касьян Олесов-Олук