Бу күннэргэ Зарема Бочкарева салайааччылаах «Фермер оскуолатын» истээччилэрэ «Саха сүөһүтэ» тэрилтэ «Таастаах» отделениетыгар сылдьыбыттар. Бу туһунан yakutckickot телеграм ханаала иһитиннэрэр.
СӨ бааһынай-фермерскэй хаһаайыстыбаларын уонна тыа хаһаайыстыбатын кэпэрэтииптэрин Ассоциацияларын толорооччу дириэктэрэ Зарема Романовнаны, үөрэх истээччилэрин управляющай Александр Оконешников көрсөн, отделение үлэтин билиһиннэрбит. Кыстыкка 238 төбө, ол иһигэр 68 ынах киирбит. Кыстык этэҥҥэ эбит. Салгыы зоотехник Ольга Аргунова саха ынаҕын аһылыгын, ыамын, ньирэйдэрин көрүүтүн-истиитин уратыларын сиһилии кэпсээбит. Оттон зоотехник Алексей Варламов хороҕор муостаахтары биир кэлим чинчийэн, сыаналааһыны (бонитировка) көрдөрбүт. Ол түмүгэр, хас биирдии сүөһү тус уратылара учуоттанан көрүллэллэр эбит.
Саха сүөһүлэрэ хоту дойду тыйыс усулуобуйатынан учуоттанан норуот селекциятын көмөтүнэн буоһатыллан таһаарыллыбыттарын истээччилэр олус интэриэһиргээбиттэр. Зоотехниктар саха сүөһүтэ аһылыгар хаппырыыһа суоҕун бэлиэтээбиттэр.
«Фермер оскуолата» диэн Россельхозбанк, СӨ бааһынай-фермерскэй хаһаайыстыбаларын уонна тыа хаһаайыстыбатын кэпэрэтииптэрин Ассоциациялара, т/х министерствота, Арктикатааҕы агротехнологическай университет холбоһук үөрэхтээһин бырайыактара буолар. Үөрэх бу дьыл алтынньы бүтүүтүттэн саҕаламмыт.
Үөрэх программатынан хас чэппиэр аайы практическай дьарык ыытыллар эбит. Зарема Романовна Бочкарева салалтатынан, истээччилэр өрөспүүбүлүкэ бастыҥ хаһаайыстыбаларын үлэтин билсибиттэр. Онон хас биирдии үөрэнээччи фермердэр, хаһаайыстыбалар күннээҕи түбүктэрин илэ харахтарынан көрөн сиһилии билсэллэригэр кыах бэриллибит.
Лена Ноговицына