Төрүт көрүҥнэргэ бастыҥнар ааттаннылар

Нам улууһун оскуолаларын үөрэнээччилэригэр төрүт көрүҥнэргэ фестиваль 6 көрүҥүн түмүгүнэн, I-кы бөлөххө Намнааҕы 1-кы нүөмэрдээх оскуола, II-с бөлөххө 2-с Хомустаах оскуолатын хамаандата, III-с бөлөххө Бөтүҥ оскуолатын үөрэнээччилэрэ кыайыылаахтарынан таҕыстылар.

Икки күн устата кыргыттар, уолаттар хабылыкка, хаамыскаҕа, төрүт ыстаныыга, төрүт ох саанан ытыыга, хапсаҕайга, мас-рестлиҥҥэ уонна чэпчэки атлетикаҕа күрэхтэстилэр. 35-тии оҕолоох толору хамаанданан киирсибит Намнааҕы 1-кы уонна 2-с нүөмэрдээх оскуолалар буолаллар. Өссө төгүл санаттахха, төрүт көрүҥнэргэ кыайбыт оҕолор “Спортивные Якутяне” спартакиадаҕа уонна “Манчаары оонньууларыгар” Нам улууһун чиэһин көмүскүөхтэрэ.

38 хабылыгы, хаамысканы оҕо сэргиирэ көһүннэ. Төрүт ыстаныыга 35 кэриҥэ үөрэнээччи ыстанна. Төрүт ох саанан ытыы көрүҥэр интэриэс улааппыт – 45 күрэхтэһээччи кэриҥэ. Чэпчэки атлетикаҕа 50 сүүрүүк кыыс уонна уол 60 м, 800 м, 2000 м, 3000 м дистанцияҕа сүүрдүлэр. Хапсаҕай көбүөрүгэр 30-тан тахса уол хапсыһыы көрдөрдө. Фестиваль саамай элбэх күрэхтэһээччилээх көрүҥүнэн буолар – мас-рестлинг. Помостка 61 үөрэнээччи тахсан мас тардыста.

I-кы бөлөххө 5 очколаах Намнааҕы 1-кы нүөмэрдээх оскуола – 1 миэстэ; Намнааҕы 2-с нүөмэрдээх оскуола (12 очко) – 2 миэстэ; Хамаҕатта орто оскуолата (14 очко) – 3 миэстэ; 1-кы Хомустаах оскуолата (29 очко) – 4 миэстэ; Хатыҥ Арыы оскуолата (48 очко) – 5 миэстэ.

II-с бөлөххө 4 очколаах 2-с Хомустаах оскуолата – 1 миэстэ; Хамаҕатта саха-француз лицей (8 очко) – 2 миэстэ; Хатырык оскуолата (10 очко) – 3 миэстэ; Партизан оскуолата (11 очко) – 4 миэстэ.

III-с бөлөххө 3 очколаах Бөтүҥ оскуола – 1 миэстэ; Салбаҥ оскуолата (3 очко) – 2 миэстэ; Көбөкөн оскуолата (7 очко) – 3 миэстэ; Затон оскуолата (30 очко) – 4 миэстэ; Искра оскуолата (31 очко) – 5 миэстэ.

📹Роман Шапошников

Харысхан Попов

Читайте дальше