Илья Винокуров аатынан Намнааҕы педагогическай колледж саалатыгар волейбол турнирыгар тохсунньу 22 күнүгэр 6 хамаанда көрүстэ. Нам улууһугар волейбол күрэхтэһиитэ Бүтүн Россиятааҕы волейбол күнүгэр ананар.
Бу сылга ыытыллыбыт аан маҥнайгы турнир Юрий Эверстов уонна волейбол федерациятын председателэ Филипп Николаев көҕүлээһиннэринэн буолбутун “Лидер” спорт киин салайааччыта Иван Яковлев этэр. Ити курдук, Ленскэй нэһилиэк олохтоох дьаһалтатын иһинэн үлэлиир “Лидер” спорт киин тэрийиитинэн ыытыллыбыт волейбол турнирыгар улуустааҕы олохтоох дьаһалта хамаандата бастаабыт. Иккис миэстэҕэ Намнааҕы педколледж преподавателлэрэ уонна үһүскэ колледж устудьуоннара тахсыбыттар.
Эрийсиилээх киирсиигэ ветераннар хамаандалара баһаарынай сулууспалаахтар уонна Николай Кейметинов хапытааннаах “КИОС” хамаанданы кыайаннар төрдүс миэстэ буолбуттар.
“Нэһилиэнньэ ортотугар волейбол уйата диэн ааттанар НПК саалатыгар “тирии мээчик” хойукка диэри күөрэйдэ. Оонньуу сылтан-сыл сайдан иһэрэ көстөр, биллэр. Турнирга өйдөөн хаалбыт түгэним, биллэн турар, 55 саастарыттан үөһэ саастаах оонньооччулар баһаарынай сулууспа сүүмэрдэммит хамаандатын кыайыыта буолар. Бу буолар аҕам саастаах убайдарбытыттан сөҕүү, убаастабыл. Таһымнаах оонньуу тахсар – күн аайы дьарыктанартан, үгүс күрэхтэһиигэ кыттартан”, – диир Иван Васильевич.
Харысхан Попов