Бүгүн, алтынньы 23 күнүгэр, Нам улууһун П.П. Ядрихинскай-Бэдьээлэ аатынан Намнааҕы Олоҥхо Дьиэтигэр өрөспүүбүлүкэбитигэр Ийэ, РФ Аҕа күннэрин чэрчитинэн, СВО-ҕа кыттар буойуттар кэргэттэригэр, ийэлэргэ, эбэлэргэ, убайдарга, аҕаларга анаммыт тэрээһин ыытылынна. Бу көрсүһүүгэ Дьокуускай куораттан ыҥырыылаах ыалдьыттар, Нам улууһун, Ленскэй нэһилиэк дьаһалталарын эппиэттээх үлэһиттэрэ кытыннылар.
Тэрээһин Алгыһынан саҕаланна. Алгысчыт Сиэллээх Сэгэйэ арыалдьыттарын кытта Алгыс сиэрин-туомун толордулар, мустубуттары арчылаатылар, ыраастаатылар. Алгысчыт ыар баттык санаа киэр кыйданарыгар, сырдык күүс, үтүө санаа баһыйарыгар, Кыайыы олохтонон, эйэлээх олох түстэнэригэр туомун туһаайда.
ЯРПНД кылаабынай бырааһа Туяра Решетникова кинилэр тэрилтэлэрин иһинэн психотерапевтическэй киин арыллыбытын, СВО байыастарыгар, кинилэр чугас дьонноругар, кыһалҕалаах дьоҥҥо реабилитация ааһалларыгар көмөлөһөллөрүн туһунан иһитиннэрии оҥордо, киин үлэтин билиһиннэрдэ, кыһалҕалаахтары киирэллэригэр ыҥырда. Психотерапевтическэй киин аадырыһа: Дьокуускай к., Ф. Попов аатынан уулусса, 16, стац. тел.: 8(4112)50-79-68, суукканы эргиччи үлэлиир “Итэҕэл” тел.:8-800-2221407.
Бу киин медицинскэй психолога Евгения Львова мустубуттарга анкетирование толоттордо, ону кылгастык ырытан, туох долгутарын быһаарда.
Мустубуттар ыалдьыттарга долгутар санааларын эттилэр, ыйытыылары биэрэн, мунаахсыйар санааларыгар хоруйдары иһиттилэр. Көрсүһүү кэнниттэн Туяра Семеновна Решетникова тус көрсүһүүлэри ыытан, санааларын иһиттэ, сүбэ-ама биэрдэ.
Бу тэрээһини “Комитет семей воинов Отечества” салайааччыта Майя Софронова көҕүлээн, иилээн-саҕалаан ыытта. Олус туһалаах көрсүһүү буолла.
Касьян Олесов-Олук