Тыа хаһаайыстыбатын салаатыгар киирбит уларыйыылар тула кэпсэттилэр

Бүгүн Нам улууһун тыатын хаһаайыстыбатын тэрилтэлэрин салайааччылара, бааһынай хаайыстыбаларын баһылыктара, нэһилиэктэргэ үлэлиир тыа хаһаайыстыбатын специалистара, кэккэ нэһилиэк баһылыктара кыттыылаах сүбэ мунньах буолла.

СӨ тыатын хаһаайыстыбатын уонна ас-үөл политикатын министрин бастакы солбуйааччыта Анна Стручкова салайааччылаах делегация тыа хаһаайыстыбатын араас салаатыгар үлэлиир дьоҥҥо, бу сылга тыа хаһаайыстыбатыгар сыһыаннаах саҥа уларыйыылар тустарынан иһитиннэрдилэр.

 

Быйылгыттан СӨ туһааннаах сокуонунан өрөспүүбүлүкэ улуустарыгар тыа хаһаайыстыбатын сорох боломуочуйалара бэриллибитэ. Эрдэ тыа хаһаайыстыбатыгар улууска өрөспүүбүлүкэттэн үп барыта тус сыаллаах ыстатыйаларынан чопчу тыырыллан кэлэр эбит буоллаҕына, билигин биир ыстатыйанан кэлэр буолар. Улуустааҕы муниципальнай тэриллии миэстэтигэр көрөн, төбө харчытыттан саҕалаан үүккэ тиийэ, туох-баар салааҕа барытыгар бэйэлэрэ ставка оҥорор буолаллар.

Итиэннэ, государственнай өйөбүлтэн үп-харчы өттүнэн өйөбүл миэрэлэрин оҥорор порталы кытта үлэ (электроннай бюджет) туһунан сырдаттылар. Билигин тыа хаһаайыстыбатынан дьарыктанар хас биирдии киһи государственнай өҥөнү оҥорор «Госуслуги» порталга регистрацияланара ирдэнэр буолбут.

Тыа хаһаайыстыбатын үлэһиттэрэ хотон тутуутун, нолуок, грангарга куонкурсу, субсидия, кредит, нэһилиэктэргэ үп хайдах тыырылларын туһунан о.д.а. ыйыттылар.

Семен Аргунов

Читайте дальше