Сомоҕолоһуу күнүн көрсө, бүгүн, сэтинньи 3 күнүгэр, Түбэ нэһилиэгэр саҥа талыллыбыт баһылык Григорий Гуляев «Түбэ нэһилиэгэ» МТ баһылыгын дуоһунаһыгар киирэр үөрүүлээх тэрээһин «Айхал» СК буолла.
Түбэтээҕи быыбардыыр учаастак председателэ В.Н. Григорьева быыбар туһунан сырдатта уонна Григорий Викторовичка баһылык буолбутун туоһулуур удостоверениены туттарда. Саҥа баһылык дьонугар-сэргэтигэр махтанна уонна андаҕар тылын эттэ. Улуус баһылыга Юрий Слепцов эҕэрдэтин тиэртэ, итиэннэ инникитин таһаарыылаахтык бииргэ үлэлииллэрин этэн туран, Григорий Гуляевка “Саха Өрөспүүбүлүкэтин тутуутун бочуоттаах үлэһитэ” үрдүк бэлиэни туттарда.
Бу күн Нам улууһун нэһилиэктэрин баһылыктара, үөрэх управлениетын начальнига Мария Игнатьева, Түбэ нэһилиэгин бастакы баһылыга Розалия Лукина, тэрилтэ салайааччылара эҕэрдэлэрин эттилэр.
Түбэтин нэһилиэгэр 3 төгүл талыллан, өр кэмҥэ үтүө суобастаахтык, таһаарыылаахтык үлэлээн кэлбит Константин Федоровка саҥа талыллыбыт баһылык “Түбэ нэһилиэгин Ытык киһитэ” бочуоттаах бэлиэни, ону сэргэ улуус баһылыга Юрий Слепцов махтал суруктары, өйдөбүнньүк бэлэҕин туттардылар. Бииргэ алтыһан үлэлээбит нэһилиэк тэрилтэлэрин салайааччылара, түөлбэ олохтоохторо истиҥ махталларын биллэрдилэр. Константин Константинович харда махталын эттэ уонна саҥа талыллан үлэлиир баһылыкка ситиһиилэри баҕарда.
Тэрээһин түмүктүүр чааһыгар Григорий Викторович дьиэ кэргэнэ уонна нэһилиэк асчыттара тэрийиилэринэн мааны астаах фуршет буолла.
Л.С. Григорьева