Түбэбит нэһилиэгэр Россияҕа «Аҕа дойдуну көмүскээччи», Саха Өрөспүүбүлүкэтигэр «Ийэ дойдуну көмүскээччи», Нам улууһугар «Кыайыы», нэһилиэкпитигэр «Балыксыт» сылларын арыйар үөрүүлээх тэрээһин буолан ааста.
Манна ытык-мааны ыҥырыылаах ыалдьыттарынан Саха өрөспүүбүлүкэтин экологияҕа, айылҕаны туһаныыга уонна ойуур хаһаайыстыбатын миниистирин солбуйааччы Анатолий Анатольевич Алексеев, «Нам улууһа» МТ баһылыгын бастакы солбуйааччы Анатолий Иванович Павлов, «Айылҕа харыстабылын», «Гражданскай килбиэн» бэлиэ хаһаайына, Нам улууһун, Түбэ нэһилиэгин «Ытык киһитэ» Розалия Егоровна Лукина, өр сылларга «Түбэ» ТХПК салайааччытынан үлэлээбит, Үрүҥ күөлгэ муҥха салайааччыта, Түбэ нэһилиэгин «Ытык киһитэ» кэлэннэр эҕэрдэлэрин, баҕа санааларын тириэртилэр. Бэс ыйын 2 күнүгэр «Балыксыт күнэ» Түбэ нэһилиэгэр ыытылларын туһунан биллэрбиттэрин бары да астына иһиттибит.
Өр сылларга балык булдугар эҥкилэ суох үлэлэспит дьоммутугар Гек Дыгыновичка “Саха сиригэр балыктааһын сайдыытыгар» бэлиэ, бочуотунай наҕараада, Дыгын Дыгыновичка, Валерий Михайловичка бочуотунай наҕараада, аҕам саастаах балыксыкка Николай Петровичка уонна муҥха тэрээһинигэр саамай сүүрэр-көтөр киһитигэр Марина Петровнаҕа Түбэ нэһилиэгин «Ытык балыксыт” бэлиэлэрин үөрүүлээх быһыыга-майгыга туттардылар.
Нэһилиэкпит Аҕа баһылыга Григорий Викторович Гуляев ыытыллыбыт брендбук күрэҕин кыайыылаахтарын билиһиннэрдэ. Бу күрэххэ уопсайа 13 оскуола үөрэнээччитэ, 4 улахан киһи көхтөөх кыттыыны ыллылар, барыта 27 үлэ киирдэ. Хамыыһыйа быһаарыытынан кылаан кыайыылааҕынан 10-с кылаас үөрэнээччитэ, Анджелина Федорова буолла, саамай элбэх эмблеманы оҥорбут, тарбаҕар талааннаах Светлана Иннокентьевна Константиноваҕа анал бириис тутардылар. Хас биирдии кыттыбыт үөрэнээччи, илии тутуурдаах буолан, үөрүүтэ үксээтэ.
Эҕэрдэ нүөмэрдэр «Балыксыт» сылыгар анаммыттара олус улахан суолтаны биэрдэ. Манна биһиги саамай кырачаан кыттааччыларбыт «Түбэчээнэ» уһуйаан кыра бөлөҕүн оҕолоро «Собо үҥкүүтүн» бэлэхтээн көрөөччүлэри сэргэхситтилэр (сал. С.Д. Харитонова), 4-с кылаас уолаттара Т.Е. Сметанин хоһоонун доргуччу ааҕан долгуттулар, уйадыттылар (сал. О.С. Куприянова) 6-с кылаас коллектива хомус алыптаах дорҕоонунан доҕуһуоллатан «Дьөһөгөй Айыыта» норуот ырыаларын дьиэрэтэ ыллаатылар (сал. Д.Е. Никифорова), «Уолан» үҥкүү бөлөҕө «Муҥха үҥкүүтүнэн» (сал. А.А. Кириллина) уонна Сардаана Харитонова бэйэтин тылларыгар, матыыбыгар «Түбэбэр» диэн ырыатынан, Марита Афанасьевна Сивцева Собо түмэлин быыстапката биэчэри олус киэргэттилэр, дьон хайҕабылын ылыаҕын ыллылар.
Түмүккэ, ыытааччылар Д.П. Попова, О.С. Куприянова ыҥырыыларынан аныгы олох хаамыытынан, ыалдьыттары, кыттааччылары кытта өйдөбүнньүк хаартыскаҕа түһэн, үөрэн-көтөн тарҕастыбыт.
Полина Шестакова, Түбэ