Түбэлэр: Оскуола тутуутун түргэтэтэргэ!

Бүгүн СӨ Правительствотын ааспыт 2023 сыллааҕы үлэтин Ким Борисов салайааччылаах бастакы бөлөх Түбэ нэһилиэнньэтигэр отчуоттаата.

«Оскуола хаарбах туруктаах буолан сабыллан турар. Оҕолор хас да сиринэн аттаран үөрэнэ сылдьаллар. Онон оскуола тутуутун түргэтэтэр сыал-сорук туруорунуҥ. Сынньалаҥ киин туруорсабыт. Оччотугар спорт саала кэҥиэ этэ. Ыччаппыт инникигэ кэскиллээх. Үрүҥ Күөлгэ даамбаны сөргүтүүнү ыытарга, ураты харыстанар сир буолар. Итиннэ олохтоохтор оттуулларыгар, сири туһаналларыгар көҥүл биэрэллэрэ буоллар. Сыралаах, түбүктээх үлэлээх тыа хаһаайыстыбатын салаатыгар үүт туттарыытыгар улахан болҕомто, күүс-уох уураргытыгар, саха тылын үөрэтиини өссө күүһүрдэргитигэр«, — диэн Розалия Лукина санаатын эттэ.

Өбүгэлэрбит сири, от хаачыстыбатын тупсарар үгэстэрин туһаныыны боппуттара Саха сиригэр улахан боппуруоһу туруорда. Хас нэһилиэк аайы ыйытыллар буолла.

Тэрээһиннээх хаһаайыстыба үүт аһын оҥорон таһаарарыгар мобильнай тэрил ыларыгар көмө баара буоллар үүт аһы батарарга улахан өйөбүл буолуо этэ диэн этиннилэр. Байыаннай дьайыы кыттыылаахтарын дьиэ кэргэнигэр көрүллэр көмө ирдэбилин ыйыттылар. Доруобуйа харыстабылын салаатыгар баар кыһалҕаларга тохтоон ыллылар. Адьырҕа кыыллары бултуурга ураты харыстанар сиргэ киирэргэ көҥүл бэриллэрин туруорустулар. Уһук Илиҥҥи гектары урбаанньыт быһыытынан туһаныыга ылан уот, газ ситимин таттарыыга күчүмэҕэйдэри көрсүбүттэрин этиннилэр.

Оскуолаҕа музей тэрийэр туһунан дойдубут президенэ Владимир Путин уураах таһаарбытын санатан туран, үлэ миэстэтин, тэрилинэн хааччыллыыга правительство өттүттэн болҕомто ууралларыгар, заправка станциятын тэрийиигэ, кыра авиацияны сайыннарыыга, улууска туттуллубут ууну ыраастыыр станция тутуутун туруорустулар.

Түбэ олохтоохторо СӨ Правительствотын ааспыт 2023 сыллааҕы үлэтин 100% биһирээтилэр.

Семен Аргунов

 

Читайте дальше