Үтүө күнүнэн, күндү ааҕааччыларбыт! Ааспыт сыллааҕы үлэбитин түмүктээн, саҥа 2024 сылга үктэнээт да, хаһыаппыт СӨ суруналыыстарын сойууһа ыытар «Издание года» номинациятыгар кыайан, лауреат үрдүк аатын сүгэн, бука бары: ааҕааччылардыын, үлэһиттэрдиин сүөм үрдээн сылдьабыт. Салгыы айарга-тутарга кынаттанан, саҥалыы күүс-уох эбиллибиккэ дылы…
Ааспыт сылга барыта 51 нүөмэри таһаардыбыт, 600-чэкэ матырыйаалы бэчээттээтибит. Маныаха биир да салааны көтүппэккэ, барыларын сырдаттыбыт, кэпсээтибит. Холобура, байыаннай дьайыы тематыгар»Дьоммутун өйүөҕүҥ» рубриканан – 20, тыа хаһаайыстыбата – 31, доруобуйа – 10, үөрэх – 21, социальнай эйгэ – 16, ИДьУО – 22, баһылык колонката – 31, улуус дьаһалтатын планеркатыттан бэлиэтээһиннэр – 37, нэһилиэктэр олохторо – 84, промышленность – 11, хааччыйыы эйгэтэ – 12, СӨ Үлэ сыла – 34, дойдуга Педагог уонна Наставник сыла – 26, культура – 18, дьиэ кэргэн – 5, оҕо, ыччат – 17, спорт – 27, кыраайы үөрэтии – 19, тыл, төрүт культура – 37, улуус дьаһалтата – 7, эдэр корреспонденнар – 13, тутуу – 8, Ил Түмэн – 7, правительство – 18, Роспотребнадзор – 11, улуус депутаттарын сессиятыттан – 4, Аҕа дойду Улуу сэриитэ – 16, национальнай бырайыактар – 17, урбаан – 6, чөл олох – 5. Маны таһынан, бу салааларга өссө сайтка, социальнай ситимнэрбитигэр: телеграмҥа, “ВКонтакте”, “Одноклассники”, ватсап бөлөххө, ютубка – матырыйааллар таҕыстылар. Ааҕааччыларбыт кыһалҕаларын, быһаарыллыбатах боппуруостарын мэлдьи болҕомтоҕо ылабыт. Маныаха «Ыйыт-хоруйдуубут» рубрика улахан көмөлөөх. Манна барыта 13 ыйытыыга эппиэт бэриллибит. Сорҕото, ол эбэтэр 10 ыйытыы, Энсиэли.рф сайтка таҕыста.
Хаһыатчыттар барыта 277 авторскай матырыйаалбыт бэчээттэннэ. Саамай элбэх ыстатыйаны Касьян Олесов -Олук суруйбут – 79, мин – 62, Семен Аргунов – 54, Харысхан – 47, шеф-редактор Майя Федорова – 26. Манна өссө сайтпытыгар, социальнай ситимнэрбитигэр тахсыбыт матырыйаалларбытын ааҕан сиппэппит. Оннук хорутуулаахтык кыһаллан үлэлээтибит. Биһигини тэҥэ саамай улахан көмөлөһөөччүлэрбит, общественнай корреспонденнарбыт, ыстатыйалара хаһыаппытын ситэрэн-хоторон биэрэн дириҥ суолталыыр. Кинилэр: Үөдэйтэн олохтоох дьаһалта сүрүннүүр специалиһа Екатерина Эверстова, 1 Хомустаахтан Анатолий Софронов — Онтуон, Лена Корякина, саха тылын уонна литературатын учуутала Алена Томская салайааччылаах эдэр корреспонденнар бөлөхтөрө, Партизантан баһылык солбуйааччыта Полина Скрябина, Никольскайтан Татьяна Терешкина, Хамаҕаттаттан Мария Винокурова, иитээччи, улууска сахалыы остуол оонньуутун федерациятын салайааччыта Маргарита Охлопкова, Хатыҥ Арыыттан олохтоох дьаһалта специалиһа Надежда Сивцева, Хатырыктан суруналыыс, норуот маастара Валентин Васильев-Эрчим Баһыл, Салбаҥтан саха тылын уонна литературатын учуутала Татьяна Касьянова уонна кини үөрэнээччилэрэ суруйдулар.
1988 сылтан “Бастыҥ общественнай корреспондент” диэн анал аат олохтонон, бу сыллар усталарыгар биир да сыл тохтообокко туттарыллан кэллэ. Онон 2023 сыл түмүгүнэн 35-с сылын бастыҥ общественнай корреспондены ааттыыбыт.
Ааспыт сылга хаһыат 850 ахсаанынан бэчээттэннэ. Сурутууга Үөдэй, 1 Хомустаах, Партизан, Хамаҕатта, Нам, Хатыҥ Арыы нэһилиэктэрэ көхтөөхтөр. 2019 сылтан «Бастыҥ почтальон» диэн анал бириэмийэ олохтооммут, почтальон чэпчэкитэ суох үлэтин өйүүбүт.
Хаһыаппыт күннээҕи сонуннарын Энсиэли.рф сайтка, социальнай ситимнэргэ: ватсапка, ВКонтакте, ОК-Одноклассники, gazetaensieli телеграм, ютуб ханаалларга таһааран, аныгы сыыппара үйэтин кытта тэҥҥэ хардыылыыбыт.
2020 сылтан хаһыат “Сахабэчээт” тэрилтэ иһинэн үлэлиир. 2021 сылга кылаабынай редакторынан анаммытым. Хаһыаппар 2003 сылтан үлэлиибин, ааспыт сылга 20 сылын туолла. Редакция билигин 9 үлэһиттээх. Орто саастаах. Кинилэр истэригэр 5 Россия суруналыыстарын сойууһун чилиэнэ, 3 СӨ Бэчээтин туйгуна бааллар.
2023 сылга биһиги сыахпытыгар биир бэлиэ уонна умнуллубат түгэнинэн бэтэрээммит, кырдьаҕас хаһыатчыт Григорий Эверстов-Тыыппалаах “СӨ Үтүөлээх суруналыыһа” ааты Нам суруналыыстарыттан бастакынан ылла. Коллектив айар-тутар, үлэҕэ-хамнаска көхтөөх. От ыйын 1 күнүгэр, национальнай Бэчээт күнүн көрсө ыытыллыбыт “Уһун Дьурантаайы” өрөспүүбүлүкэтээҕи суруналыыстар куонкурустарыгар Касьян Олесов-Олук «Бастыҥ кэпсэтээччи» — II-с, Семен Аргунов «Бастыҥ кэпсээччи» III-c бочуоттаах миэстэлэри ылбыттара. Өймөкөөҥҥө ыытыллыбыт Олоҥхо ыһыаҕар хаһыат анал корреспондена Айсен Федоров өрөспүүбүлүкэтээҕи суруналыыстар бөлөхтөрүгэр киирэн ыһыаҕы сырдаппыта. Муус устарга Дьокуускайга ыытыллыбыт көҥүл тустууга эдэр бөҕөстөр Россияҕа бастыыр иһин турнирдарыгар Харысхан Попов спортивнай суруналыыс быһыытынан үлэлээбитэ. Хаһыаты таһынан, бэчээккэ кинигэ бэлэмниибит, видеосюжет оҥоробут.
Бу курдук үлэлиибит, айабыт-тутабыт. Ситиһиилэрбит биһигини элбэххэ кынаттыыллар, айар үлэҕэ, ааҕааччыларбыт туһугар үлэбитин өссө күүһүрдэргэ сирдииллэр. 2025 сылга тапталлаах хаһыаппыт 90 сааһын туолуоҕа. Онуоха бу үүммүт саҥа 2024 сыл үбүлүөйдээх даатаны дьоһуннаахтык көрсөргө олук ууруоҕа.
Норуот күүһэ – көмүөл күүһэ! Улууска төрөөбүт тылынан тахсар соҕотох хаһыаты сурутан ааҕыҥ, мэлдьи олох үөһүгэр буолуҥ!
2023 сыл бастыҥнара
- «Бастыҥ корреспондент” – Татьяна Касьянова
- «ЭНСИЭЛИ.РФ сайт бастыҥа» – Надежда Сивцева
- «РФ Педагог уонна Наставник сылын бастыҥ сырдатааччы” – Мария Винокурова
- «СӨ Үлэ сылын бастыҥ сырдатааччы» — Екатерина Эверстова
- «За информативность» – Полина Скрябина
- “Преданность теме” – Маргарита Охлопкова
- «Юнкор бастыҥ салайааччыта» – Алена Томская
- «Бастыҥ почтальон» – Афанасий Ядреев
- «Элбэх сонуннаах нэһилиэк» – 2023 с. (Ленскэй нэһилиэк)
- Вера Рыкунова аатынан бириэмийэ – “Эҥсиэли” хаһыат корректора Валентина Лукавина.
Маны сэргэ, «Эҥсиэли» хаһыаты кытта бииргэ үлэлэрин, көмөлөрүн иһин общественнай корреспонденнар Валентин Васильев-Эрчим Баһылга, Лена Корякинаҕа, Татьяна Терешкинаҕа, Анатолий Софронов-Онтуоҥҥа, Намнааҕы история уонна этнография түмэлин салайааччыта Александр Копыриҥҥа, Н.М. Рыкунов аатынан Намнааҕы киин библиотека салайааччыта Майя Софроноваҕа, «Нам улууһа» МТ пресс-сулууспатын пресс секретара Анна Созоноваҕа махталбытын биллэрэбит.
Лена Ноговицына, «Эҥсиэли» хаһыат кылаабынай редактора