Бүгүн Аппааны бөһүөлэгэр олус долгутуулаах уонна күүтүүлээх күн үүннэ. Ол курдук, «Мавра» оҕо уонна ыччат сынньанар киинигэр Саха республикатын Ил Дарханын Гранын кыайылааҕар — Аппааны «Чэчир» түөлбэтигэр (ТОС) грант сертификатын туттарыы үөрүүлээх тэрээһинэ буолла.
Быйыл Саха өрөспүүбүлүкэтин Ил Дархана Айсен Николаев түөлбэлэр сайдыыларыгар грант биллэрбит күрэҕэр Нам улууһун дьаһалтата кыттыыны ылан, грант кыайыылааҕа буолан, Нам улууһун муниципальнай тэриллиилэргэ иккис этабынан куонкурус биллэрбитэ. Бу куонкуруска «Хатыҥ Арыы нэһилиэгэ» МТ дьаһалтата ситиһиилээхтик кыттан иккис бириистээх миэстэни ылбыта.
Салгыы «Хатыҥ Арыы нэһилиэгэ» МТ нэһилиэк түөлбэлэригэр үһүс этабынан куонкурус биллэрбитэ. Куонкуруска икки бырайыак киирбититтэн, «Чэчир» түөлбэ «Благоустройство зоны отдыха озера Мавра с. Аппаны» бырайыага кыайыылаах үрдүк аатын сүгэн, бырайыак олоххо киирэригэр 259 тыһ. 175 солк. суумалаах сертификатынан наҕараадаланна.
«Чэчир» ТОС салайааччыта Марианна Винокурова түөлбэ олохтоохторун, оҕолорун кытта сынньанар киини ыраастаан, сиппийэн үөрүүлээх тэрээһиҥҥэ бэлэмнээтилэр. «Уником» ХЭТ генеральнай дириэктэрэ Николай Петровтуун дуогабар түһэрсэн, 10 тимир ыскамыайка, 10 бөх быраҕар урна оноттордо.
Сертификаты туттарыы үөрүүлээх тэрээһинигэр баһылык Иван Ноговицын, Нам улууһун мунньаҕын депутата, исписэлиис Владимир Соловьев, сүрүннүүр исписэлиис Надежда Сивцева, «Уником» генеральнай дириэктэрэ Николай Петров, ТОС «Чэчир» салайааччыта Марианна Винокурова олохтоохторго эҕэрдэ тыл эттилэр. Петр Машников, И.Е. Винокуров аатынан Хатыҥ Арыы орто оскуолатын үрдүкү кылаас оҕолоро эҕэрдэ музыкальнай нүөмэрдэри биэрдилэр.
Хатыҥ Арыы нэһилиэгин ветераннарын уонна пенсионердарын председателэ, «Тэтим» хотугу скандинавскай хаамыы кулууп салайааччыта Оксана Лебедева эҕэрдэ тыл эттэ уонна улуус баһылыга Юрий Слепцов бэлэҕин икки паара хаалыгы 70 саастарын ааспыт аҕа ветераннарга Елена Чупроваҕа, Анна Сыромятниковаҕа үөрүлээх быһыыга туттарда.
Аппааны олохтооҕо Борис Чупров оҕолорго батут туруорда, Ольга Рожина минньигэс саахарнай баата атылаата. Маны тэҥэ, «Тэтим» хотугу скандинавскай хаамыы чилиэттэрэ уонна Нам улууһун скандинавскай хаамыы федерациятын салайааччыта Дмитрий Елисеев туруорбут бириистэринэн кэлбит оҕолорго араас спортивнай, көрдөөх оонньуулары ыыттылар. Бары кыттыбыт оҕолор бириис тутуурдаах үөрэн-көтөн тарҕастылар.
Тэрээһини «Чороон» НАК үлэһиттэрэ, дириэктэр Саргылана Пономарева салайыытынан ыытылынна, Горьяна Стрекаловская иилээн-саҕалаан ыытта.
Бу курдук Өрөспүүбүлэкэбит Ил Дархана ыытар граннарыгар өссө да ситиһиилээхтик кыттан, түөлбэлэрбит киэркэйэ, сайда туралларыгар баҕарабыт!
Надежда Сивцева