Түмсүүлээх үлэ түмүгэ – сайдыы

Инники эппитим курдук, түмсүүлээх буолан үлэни-хамнаһы модуттар кыайа туппуттарын көрөн, сөҕөн-махтайан кэллим. Ууга барбыты эрэ туоратыынан муҥурдаммакка, өссө таһаарыылаахтык тэринэн үлэни ыыппыттар.

Федеральнай “1000 дворов” программаҕа киирсэн кыайан, олус үчүгэй, оҕо-уруу, дьон-сэргэ сынньанарыгар аналлаах мини-парка тутан, оҥорон үлэҕэ киллэрбиттэр. Көмөҕө кэлбит хортуоппуйдарын ыһан үүнүү бөҕөнү ылан, саҥа туттубут овощехранилищеларыгар ууран көрө-харайа сылдьаллар. Хранилищеларын ИП буолбут үс эдэр уол көрөллөр-истэллэр эбит. Мин сылдьарбар Протодьяконов Алквиад баара. Баһылык Гоголев Ефим Ефимовиһы кытта наадатын быһаарса, переборка ыыта сылдьалларын кэпсээтэ. Бу хранилище тыа хаһаайыстыбатын иһинэн ылыллыбыт “Развитие кооперации” программанан тутуллубут. Аны бүтүн нэһилиэк суунарыгар-тараанарыгар анаан, уопсай баанньык тутуллан, эбиитин прачечнайдаан, үлэҕэ киирэрэ чугаһаан турара.

Сааскы халаан кэмигэр дьиэ үрдүнэн барбыт Иван Гуляев дьиэтэ бүгүҥҥү күҥҥэ маннык.

Күн бүгүҥҥээҥҥэ диэри субуотунньук бөҕө тэриллэн ыытылла турар. Саҥа оскуола иһиттэн-таһыттан 3000 куб бөх-сыыс хомуллубут. Сайын лааҕырдарыгар 60-ча оҕо сылдьан, оҕуруот аһын олордуутунан, көрүүтүнэн-харайыытынан дьарыктаммыттар. Онно “Үөрэхтээһин оҕо сынньалаҥын үлэтин тэрийии” программатынан биир дьиэни туппуттар. Күһүн үтүмэн үүнүүнү ылан оҕолор үөрүү-көтүү, астыныы буолбуттар. Бөһүөлэк иһинэн, сайылык суоллара турба уктаран, капитальнайдык оҥоһуллубуттар. В.В. Путины талар быыбарга нэһилиэк 100% куоластаан бастаабыт.

Быйылгы 2025 сылга Модут нэһилиэгэ былаана үгүс. Олортон аҕыннахха: сайыҥҥы лааҕырга өссө биир дьиэни туттарга туруорсаллар, иккис овощехранилищены ситэрэн үлэҕэ киириэхтээх, ФАП тутуутун ситэри туруорсан тутуу, “Кыйыда” алааһыгар уот тартаран, сылгы баазатын тутан, тэрийэн бөһүөлэктэн сылгыны онно тутаары тэринэллэр. Оскуола үлэҕэ киирдэҕинэ, музыкальнай үлэһит туруорсаллар. Оҕолор эргиччи сайдалларыгар туһалаах буолуохтаах. Сүөһүнү эбии тутарга саҥа хотон туттуохтаахтар. Специалистарга анаан муниципальнай, түөрт квартиралаах, толору хааччыллыылаах дьиэ көҥдөйө тахсан турар. Ол дьиэ бу үүммүт сылга үлэҕэ киириэхтээх. Бөһүөлэк иһинэн-таһынан эбии суол оҥоһуллуохтааҕа былааҥҥа турар. Быйылгы 2025 сыл дойдуга “Год защитника Отечества”, Сахабыт сиригэр “Год патриотизма”, модуттар “Дойдунат сылын” олоххо киллэрии диэнинэн салайтаран үлэни-хамнаһы сүрүннээн ыытыахтаахтар. (“Патриотизм” диэни учуонайдар “Дойдунат” диэн тылбаастаабыттар. Маҥнайгынан модуттар туттар буоллулар). Кыайыы 80 сылыгар анаммыт хамсааһыннары тэрийии, тэнитии үлэлэр ыытыллаллара биллэр.

Бу күннэргэ Модут нэһилиэгин 2024 сыллаах үлэтин түмүгүн бэлэмнии, бооччойо сылдьаллар. Ол кэнниттэн атын салаалар түмүктэрин кытта сиһилии билсэн, ааҕааччыларбытыгар таһаарыахпыт.

Маннык түмсүүлээхтик үлэлии-хамсыы олорор нэһилиэк ситиһиилэрэ да үтүмэн буолуо диэн эрэнэ саныыбын.

Т. Никольская

Читайте дальше