Хамаҕаттаҕа “Эрчим” спорт комплекска Нам улууһун оҕолоро “Игры предков” многоборье сүүмэрдиир түһүмэҕэр күрэхтэстилэр.
Улуус таһымыгар ыытыллыбыт многоборьеҕа 20 түргэн, сымса, күүстээх кыыс уонна уол кыттыыны ылбыт. Ол курдук, алтынньы 5 күнүгэр буолбут “Игры предков” многоборьеҕа сүүмэрдиир күрэхтэһии уолаттар 6 көрүҥҥэ, кыргыттар 4 көрүҥҥэ бастыыр иһин күрэхтэспиттэрин Намнааҕы оҕо спордун киинин дириэктэрэ Юрий Балаганскай этэр.
“Үс төгүл үс” ыстаныы, тутум эргиир, мас-рестлинг, хапсаҕай, кириэс тэбии, хабылык, хаамыска көрүҥнэригэр уолаттарга бастыҥ көрдөрүүлээхтэр: 9-10 кылаастарга 1 Хомустаахтан Мамаев Владислав; 11 кылаастарга улуустааҕы гимназияттан Кулаков Эрсан.
Кыргыттарга “Үс төгүл үс” ыстаныы, тутум эргиир, кириэс тэбии, хабылык, хаамыска көрүҥнэр түмүктэринэн кыайыылаахтарынан ааттаннылар: 9-10 кылаастарга Хамаҕаттаттан Иванова Тая; 11 кылаастарга Хамаҕатта үөрэнээччитэ Строева Аэлина.
Улууска кыайыыны суруммуттар, өрөспүүбүлүкэҕэ бастыыр иһин “Игры предков” многоборьеҕа Нам улууһун чиэһин көмүскүөхтэрэ.
“Күрэхтэһиини тэрийэргэ биир идэлээхтэрбит көмөлөрүгэр, кылаабынай судьуйа Антон Тойтоновка Намнааҕы оҕо спордун киинин аатыттан улахан махталбытын биллэрэбит.
Улуус таһымыгар ыытыллыбыт многоборьеҕа кыттыыны ылбыттарга инникитин ситиһиини баҕарабыт. Кыайыылаахтар өрөспүүбүлүкэҕэ бастыыр иһин күрэхтэһиигэ бастыҥ көрдөрүүлэри биэрэллэригэр баҕа санаабытын этэбит”, – диир дириэктэр Юрий Сергеевич.
Харысхан Попов