“Эҥсиэли” редакциятын уонна тус бэйэм ааппыттан эһигини Россия Бэчээтин күнүнэн истиҥник эҕэрдэлиибин! Тохсунньу 13 күнэ үгэскэ кубулуйбут биһиги биир баар-суох идэлээх бырааһынньыкпыт буолар. Ону кытта тэҥҥэ түмүгү таһаарар, былааннары ылынар суолталаах кэммит.
2024 сылга “Эҥсиэли” хаһыакка барыта 51 нүөмэр таҕыста, 941 матырыйаал бэчээттэннэ (2023 сылга 600-кэ этэ). Ол иһигэр: «Бэҕэһээ, бүгүн, сарсын» — 35, СВО—38, нэһилиэктэр сонуннара – 41, халаан уута – 32, Оҕо саас сыла – 16, Дьиэ кэргэн сыла – 31, тыа хаһаайыстыбата – 44, промышленность – 5, «Доруобуйа» нац. бырайыак – 6, сурутуу – 10, культура – 61, үөрэх – 41, «Үөрэхтээһин» нац. бырайыак – 3, хааччыйыы эйгэтигэр – 12, юнкордар суруктара — 5, Улуу Кыайыы – 19, спорт – 8, урбаан – 8, «Олорор дьиэ» нац. бырайыак – 5, ИДьУО – 21, «Суол» нац. бырайыак – 11, «Демография» — 4, улуус баһылыгын колонката – 11, доруобуйа – 8, баһаартан сэрэхтээх буолуу – 21.
Судаарыстыбаннай сорудах быһыытынан 2020 сылтан ЭНСИЭЛИ.РФ сайт үлэлэтэбит. Ирдэбил быһыытынан сайтка күн аайы 5-тэн итэҕэһэ суох матырыйаал тахсыахтаах. Биир да күн тохтуо суохтаах. Биллэн турар, биһиги ону толоробут. Үксүгэр 5-тэн элбэх матырыйаал тахсан тарҕанар. Социальнай ситимнэртэн сүрүн былаһааккабыт телеграм ханаалбыт буолар. Манна күҥҥэ саамай элбээбитэ 20-чэ сонун тахсар. 2021 сыл сааһыгар тэриллибит ханаалбыт 4300-тэн тахса сурутааччылаах. Барыта 16307 хаартыска, 3814 видео таҕыста. Сонун тута, түргэнник тарҕанар буолан, олус табыгастаах былаһаакка. Кэтээн көрүү түмүгүнэн, улууспут, өрөспүүбүлүкэбит, дойдубут олохтоохторун таһынан, биһиги телеграм ханаалбытын Францияҕа, Германияҕа, Нидерландыга, Великобританияҕа ааҕаллар, көрөллөр.
Бу балысхан кээмэйдээх үлэбитигэр общественнай корреспонденнарбыт көмөлөрө улахан оруолу ылар. Кинилэр сонуннарынан хаһыат, сайт, соц. ситимнэрбит үлэтэ толору, баай ис хоһооннонор. Онон идэлээх хаһыатчыттары тэҥэ сыаналанар, убаастанар дьон. Сурук үлэтэ манан аҕай дьыала буолбатах. Ону барытын ылынан, сүрэхтэринэн-быардарынан сөбүлээн, олохторун сорҕото оҥостон, күн бүгүнүгэр диэри кыдьыктарын ыһыктыбакка илдьэ сылдьалларын хайгыыбыт. 1988 сылтан «Бастыҥ общественнай корреспондент» диэн аат иҥэриллэр.
Билигин редакцияҕа суруйар корреспонденнарбыт үгүстэрэ – бастыҥнар! Кинилэр: Екатерина Эверстова (Үөдэй), Анатолий Софронов – Онтуон (1 Хомустаах), Лена Корякина-Элиэнэ Кэрэ (1 Хомустаах), Полина Скрябина (Партизан), Татьяна Терешкина (Никольскай), Мария Винокурова (Хамаҕатта), Маргарита Охлопкова (Хамаҕатта), Надежда Сивцева (Хатыҥ Арыы), Валентина Колесова (Бөтүҥ), Валентин Титович Васильев – Эрчим Баһыл (Хатырык), Татьяна Касьянова (Салбаҥ), Мария Бястинова (Искра). Кинилэринэн киэн туттабыт уонна хардарыта сибээстээх үлэбит уһун сылларга салҕанан бара туруо диэн бүк эрэллээхпит.
Сырдатар үлэбитин тэрийиигэ дьоһун кылааттарын киллэрэр, сурутуу хампаанньатын өйүүр, биһиэхэ көмөлөһөр дьоммутугар: СӨ Судаарыстыбаннай Мунньаҕын (Ил Түмэн) Бэрэссэдээтэлэ Алексей Еремеевкэ, депутаттарбытыгар, Нам улууһун баһылыгар Юрий Слепцовка, улуус баһылыгын I солбуйааччытыгар Анатолий Павловка, улуус мунньаҕын бэрэссэдээтэлигэр Алексей Винокуровка, Ленскэй нэһилиэк баһылыгар Петр Сокольниковка, сэлиэнньэ депутаттарын сэбиэтин бэрэссэдээтэлигэр Егор Охлопковка, түөлбэ салайааччыларыгар, биирдиилээн нэһилиэк баһылыктарыгар, почта салалтатыгар, начальник Дария Уваровскаяҕа, почтальоннарга бу үөрүүлээх бэлиэ күҥҥэ махталбын тиэрдэбин.
Күндү дьоммут! Саҥа 2025 сылы, буоларын курдук, үчүгэйгэ, үтүөҕэ эрэл санаалаах көрсөбүт. Бэйэ-бэйэбитигэр доруобуйаны, үтүмэн үөрүүнү баҕарыахха! Хаһыаппыт быйыл үбүлүөйдээх сыла. Алтынньыга 90 сааһын туолуоҕа. Улууспутугар ытык саастаах соҕотох хаһыат буолабыт. Бу төгүрүк сыыппара төһөлөөх историяны, дьон дьылҕатын илдьэ сылдьара буолуой?! Үбүлүөйдээх сылга элбэх былааннаахпыт. Маныаха, көх-нэм буолан кыттыһаргытын күүтэбит.
Бука бары саҕалаабыккыт үтүө түмүктээх буоллун, үлэҕит кэрэхсэнэ турдун! Эһиэхэ уонна чугас дьоҥҥутугар чэгиэн туругу, дьолу-соргуну уонна этэҥҥэ буолууну баҕарабыт!
Лена НОГОВИЦЫНА, “Эҥсиэли” редакция кылаабынай редактора, коллектива