Учуутал үүнэр көлүөнэ ыччаты иитэн-үөрэтэн олоҕу салгыыр, билии киэҥ аартыгар кынаттыыр. Биир оннук үтүө киһинэн Хатыҥ Арыы нэһилиэгин олохтооҕо, педагогическай үлэ бэтэрээнэ, РФ үөрэҕириитин туйгуна, СӨ үөрэҕин тиһигин бочуоттаах бэтэрээнэ, «СР учууталларын учуутала» бэлиэлээх Анна Ивановна Леонтьева буолар.
Анна Ивановна биһиги уһуйааммытыгар, Аппааны «Хатыҥчаана» 1-кы №-дээх оҕо сайдар киинигэр, Педагог уонна Наставник сылынан бэйэтин үтүө санаатынан, баай уопутун тарҕатан, биһиэхэ, иитиллээччилэргэ билиитин иҥэрдэ. Оскуолаҕа киириэн иннинээҕи саастаах оҕолор «Смайл» бөлөҕөр дорҕоону билэргэ, истэргэ үөрэтэн-такайан 2022-23 үөрэх дьылыгар 18 иитиллээччибитин оскуолаҕа атаарбыппыт.
Дорҕоону үөрэтэр дьарыкпытыгар бэйэтэ оҥорбут көрдөрөр, туттар тэрилин, хартыыналарын илдьэ кэлэн нэдиэлэҕэ биирдэ олус туһалаах, билиилээх дьарыктары ыыппыта. Ол курдук, дорҕоону буукубаттан араарарга, фишканан туһанарга үгүс уопуту биэрдэ. Онон оскуолаҕа оҕолорбут бэлэмнээх киирбиттэринэн иитээччилэр, төрөппүттэр махталбыт муҥура суох.
Анна Ивановна үөрэҕирии эйгэтигэр 40 сыл эҥкилэ суох үлэлээн, үгүс оҕону ааҕарга-суруйарга үөрэтэн сырдыкка-кэрэҕэ угуйбут учуутал буолар. Ити сыллар тухары «Букубаар» дьикти хонуутугар оҕолору сиэтэн киллэрдэҕэ, ааҕыы-суруйуу абылаҥар умсугуттаҕа. Билигин төһө да бочуоттаах сынньалаҥҥа олордор үөрэппит оҕолоро бэлиэ күннэргэ тиһигин быспакка учууталларыгар ыалдьыттыыр үтүө үгэстээхтэр. Баай уопуттаах учууталларыгар, үөрэх-билии ылбыт үөрэнээччилэрэ билигин оҕолорун, сиэннэрин ааҕарга эбии дьарыктаталлар. Кини хаһан да аккаастаабат, үтүө майгылаах буолан дьиэтигэр ыҥыран, эбэтэр оскуолаҕа тиийэн күүс-көмө буолар. Дьиэтээҕи түбүгүттэн быыс-арыт булан, биһиги уһуйааммытын кытары алтыһан олуһун көмөлөстө, сүбэлээтэ-амалаата. Кэтэһиилээх ыалдьыппыт, оҕолорго эбээбит буолбута. Кини биэрбит уопутун инникитин үлэбитигэр туһаныахпыт диэн эрэннэрэбит.
А.И. Леонтьева 1967 с. Намнааҕы педагогическай училищены бүтэрэн Искра алын сүһүөх оскуолатыттан учуутал эппиэтинэстээх үлэтин саҕалаабыт. Онтон 1972 с. Хатыҥ Арыы орто оскуолатыгар үгүс кырачаан оҕону ааҕарга, суруйарга үөрэтиигэ билиитин-көрүүтүн уурбут. Эдэр учууталга Саха АССР үтүөлээх учуутала Е.К. Попова уонна ССРС үөрэҕириитин туйгуна М.А. Дьяконова сүбэ-ама биэрэннэр, саҥа «Букубаар» эксперименигэр үлэлэспит. Ол кэмҥэ М.Е. Охлопкова Эльконин оҕо дорҕоону истэр дьоҕурун эрдэ сайыннарар тосхолугар олоҕуран Анна Ивановна бары сатабылын ууран, үөрэтии ситимин баһылаан, тыл баайын оҕо этигэр-хааныгар иҥэрэн бэйэтэ ураты көрүүлээх бастыҥ учуутал буола үүммүт.
Варвара Аргунова, иитээччи