П.П. Ядрихинскай-Бэдьээлэ аатынан Намнааҕы Олоҥхо дьиэтигэр оҕолорго улуустааҕы “Оһуокайдаан ойуохха – эһиэкэйдээн тэйиэххэ!” күрэс буолла. Оһуохай көлүөнэттэн көлүөнэҕэ тиэрдиллэригэр оҕолору уһуйаллар.
“Өбүгэ төрүт үҥкүүтэ – оһуохай өрө тутуллуохтаах. Оһуохайдыыр оҕо элбээн, оһуохайы киэҥ эйгэҕэ таһаарыахтаахпыт, үйэтитиэхтээхпит”, – диир Олоҥхо дьиэтин үлэһитэ Туйаара Мегина.
Улуустааҕы оһуохай күрэҕэр барыта 15 оҕо кыттыыны ылла. Ол курдук, 7-12 саастарыгар диэри 3-с миэстэни Таастаах оскуолатын үөрэнээччитэ Артемьева Ирена, 2-с миэстэни Партизан оскуолатын үөрэнээччитэ Парникова Аэлита ыллылар уонна бастыҥ этээччинэн Партизантан Саввинова Елена буолла.
Оттон 13-17 саастаахтарга үһүс этээччи – Намнааҕы 1-кы нүөмэрдээх оскуола үөрэнээччитэ Сивцев Виталий, иккис этээччи – Партизантан Гуляев Кэскил уонна оһуохай тылын бастыҥ таһаарааччынан Намнааҕы 2-с нүөмэрдээх оскуола үөрэнээччитэ Шадрина Эвилья ааттанна.
Кыайыылаах оҕолор өрөспүүбүлүкэтээҕи оһуохай күрэҕэр Нам улууһун чиэһин көмүскүөхтэрэ.
Харысхан Попов