Улуу кыайыы 80 сылын чэрчитинэн, олунньу 15 күнүгэр И.С. Гаврильев аатынан Намнааҕы 1-кы нүөмэрдээх оскуолаҕа үөрэх эдэр үлэһиттэрин идэлээх союһун икки ардыгар байыаннай хаамыы көрүү күрэҕэ ыытылынна.
Күрэх 2 түһүмэхтэн турар: хаамыыны көрүү уонна Калашников автоматы бириэмэҕэ ыһыы, хомуйуу. Дьүүллүүр сүбэҕэ Нам улууһун военкоматын комиссара, Владислав Васильев; улуустааҕы ыччат отделын специалиһа, Алина Неустроева; Нам улууһун МВД ветераннарын сэбиэтин чилиэнэ, Евсей Попов; байыаннай дьайыы кыттыылааҕа, Сергей Сивцев; Нам улууһун үөрэх үлэһиттэрин идэлээх союһун председателэ, Надежда Васильева үлэлээтилэр.
Күрэх үөрүүлээх аһыллыытыгар Нам улууһун баһылыгын солбуйааччыта Егор Протопопов эдэрдэргэ эҕэрдэ тылын эттэ. Парады тутааччынан МВД ветерана, Нам улууһун аҕа сэбиэтин чилиэнэ Дмитрий Зырянов үлэлээтэ. Ол курдук, күрэххэ уопсайа 6 хамаанда кыттыыны ылла: Намнааҕы 1-кы нүөмэрдээх оскуола, Н.С. Охлопков аатынан улуустааҕы гимназия, Намнааҕы 2-с нүөмэрдээх оскуола, Модут оскуолата, Е.М. Шапошников аатынан Хамаҕатта оскуолата, И.Е. Винокуров аатынан Хатыҥ Арыы оскуолата.
Калашников автоматы ыһыыга, хомуйууга 24,73 сөк. бириэмэлээх муҥутуур кыайыылааҕынан Ариан Иванов (Модут) таҕыста. 2 миэстэ – 26,20 көрдөрүүлээх Рустам Дмитриев (Хамаҕатта). 3 миэстэ – 29, 18 көрдөрүүлээх Владимир Прудецкай (НСОШ2). Ону таһынан, хамаандалар кубоктарынан уонна бириистэринэн наҕараадаланнылар. Хамаандалар сүрдээх бэлэмнэнэн кэлбиттэрэ тута көстөр, хаамыылара биир киһи курдук. Ырыаһыттарынан Е.М. Шапошников аатынан Хамаҕатта орто оскуола хамаандата дьүүллүүр сүбэ хайҕабылын ылан “Лучшая строевая песня” анал ааты ыллылар. Ураты көстүүлээх байыаннай таҥастаахтарынан Намнааҕы 1-кы нүөмэрдээх орто оскуола хамаандата “Лучшая форма” анал аат хаһаайына буолла. Оттон хамандыырдартан уһулуччу үчүгэйинэн ааттанан “Лучший командир” анал ааты Николай Корнилов (НСОШ1) ылла.
Күрэх түһүмэхтэринэн түмүккэ 1-кы миэстэ – Намнааҕы 1-кы нүөмэрдээх оскуола, 2-с миэстэ – Хамаҕатта оскуолата, 3 миэстэ –Хатыҥ Арыы оскуолата.
Кыттыбыт хамаандалар бары үөрэн-көтөн, бэйэлэрин кытта билсэн-көрсөн, маннык күрэхтэр мэлдьи ыытылла турдуннар диэн баҕа санааларын эттилэр. Нам улууһун үөрэх үлэһиттэрин ыччата куруутун маннык көхтөөх кыттыыны ылаллара хайҕабыллаах уонна үүнэр көлүөнэҕэ үтүө холобур буолар.
Нам улууһун үөрэх үлэһиттэрин идэлээх сойууһа