Нам улууһун дьаһалтата уонна баһылык Юрий Слепцов 2019 сылтан саҕалаан элбэх оҕолоох, көмөҕө наадыйар ыалларга бэйэтин саҥа дьыллааҕы ас-үөл нобуорун уонна эҕэрдэ суругун дьиэ кэргэттэргэ бэлэх уунара үтүө үгэскэ кубулуйда.
Быйыл эмиэ, үгэс быһыытынан, Хатыҥ Арыы нэһилэгин 13 элбэх оҕолоох ыалларыгар Юрий Слепцов Саҥа дьылынан оҕолорго анаммыт минньигэс бэлэҕин үөрүүлээх быһыыга сылдьан, хас биирдии ыалга тиийэн туттардыбыт.
Нам улууһун дьаһалтатын баһылыгар Юрий Слепцовка, дьиэ кэргэн уонна ыччат политикатын отделын салайааччытыгар Екатерина Евстафьеваҕа, специалист Лидия Еремееваҕа бары дьиэ кэргэттэр ааттарыттан махтал тылларын тиэрдэбит!
Кэлэн иһэр 2024 сыл үтүөнү-кэрэни, эйэлээх олоҕу түстээтин, бары доруобай, чэгиэн буолуҥ!
Надежда Сивцева